Breudwd Rhyddiaith Gymraeg 1300-1425
English

Llsgr. Amwythig 11 – tudalen 55

Pa ddelw y dylai dyn gredu i Dduw

55

a|e eni yn dẏn A bot meir arglỽẏdes ẏn
vorỽẏn kyn escor a gỽedẏ escor Credu
iessu grist vn mab duỽ a|anet o veir
ỽẏrẏ dẏuot ẏ diodef ẏ dodi ar prenn croc
ẏr rẏdhau plant Adaf o gethiỽet uffern
A|e varỽ a|e cladu a discẏn ẏ eneit y anre+
ithaỽ vffern o|e hetholedigẏon a oẏdẏnt
ẏndẏ ẏ trẏdẏdẏd ẏ kẏuodes o veirỽ A|r
deugeinuet dyd gỽedẏ hẏnnẏ yd escẏn+
nỽẏs ar nefoed A|r decuet dyd ỽedy hẏn+
nẏ ẏd anuones ẏr ẏsprẏt glaar ẏr eb+
estẏl a|e discẏblon a|oẏdẏnt ẏg|kaerus+
salem Credu ẏ iessu crist rodi medẏant
a gaỻu ẏ|r ebestyl a|thrỽẏdunt ỽẏnteu ẏ
vrdolẏon breladẏeit ẏr eglỽẏs ẏ gaethu
ac ẏ rydhau eneideu ẏ bobẏl o bob rẏỽ
bechaỽt o|a vei arnadunt A hẏnnẏ trỽ+
y rinỽedeu ẏr eglỽẏs Credu kẏuot paỽb
ẏn|ẏ gnaỽt a dẏuot rac bron crist dẏd+
braỽt  varnu abaỽb herỽẏd ẏ ỽeithret pri+