LlGC Llsgr. Peniarth 32 (Y Llyfr Teg) – tudalen 51
Llyfr Iorwerth
51
butein kyt dycker treis arnei; ny|dyly kaffel
iaỽn. O sarheir hitheu taler y sarhaet ỽrth
vreint y braỽt. a|e galanas o|r ỻedir Pob kyfla+
uan o|r a|wnel gỽreic. talet y chenedyl drosti ual ̷
dros ỽr ony byd gỽryaỽc; o|r byd gỽryaỽc hitheu.
talet hi a|e gỽr y dirỽy a|e chamlỽrỽ. Tri agky+
uarch gỽr; y varch a|e arueu. a|r eil yỽ yr hynn
a|del idaỽ o daeret y dir. a|r trydyd yỽ yr hynn
a|del idaỽ yn wynebwerth y gan y|wreic am y
ohebu. ny dyly ef rannu yr vn o|r tri|pheth hyn+
ny a|e wreic. Tri aghyuarch gỽreic ynt. y thri
phrifei. a hynny ny dyly hitheu y rannu a|e|gỽr.
O |Deruyd y|dyn torri troet aniueil dyn
araỻ neu y vordỽyt. neu wneuthur
briỽ y del nychdaỽt yr aniueil o·honaỽ. a bot
yr aniueil yn lan ual y gaỻer yssu y gic. iaỽn
yỽ y|r dyn a|e briỽho kymryt yr aniueil attaỽ
o|e uedeginyaethu yny vo iach. kany dyly per+
chennaỽc yr aniueil lauuryaỽ dros agkyfreith. y neb
a wnaeth y cam idaỽ. ac os aniueil blith a
vriwir neu ych a|ardho; rodher o|e perchennaỽc
aniueil kyfryỽ kystal ac ef y wneuthur yr
un·ryỽ vỽynhant ac ef ac a|wnelhei yr eidaỽ
e|hun. ac os marỽ vyd yr aniueil; trigyet yr
arỽystyl yn dilis yn|y le. Os byỽ vyd ynteu; a|e
welet yn iach telediỽ; kymeret paỽb y eidaỽ
| « p 50 | p 52 » |