LlGC Llsgr. Peniarth 190 – tudalen 162
Ystoria Lucidar
162
o ynuytrỽyd a dolur a|thrueni y gỽybydyant.
ac megys y kyssyỻta melys gedymdeithyas
y rei hynn. veỻy y poena chwerỽ elynyaeth
y rei ereiỻ. ac megys y mae kyttuundeb y+
rỽng y rei hynn e|hunein. ac y·ryngthunt
a phob creadur. veỻy y byd anosgymot y+
rỽng y rei hynny e|hunein. ac y·ryngthunt
a|phob creadur. Ac megys y|drychefir y rei
hynn o oruchaf aỻu. veỻy y gostyngir y
rei ereiỻ ar yr anaỻu mỽyhaf. ac megys
y drychefir y rei hynn o|r anryded mỽyaf.
Veỻy y gostyngir y rei ereiỻ o|r amharch
mỽyaf. ac megys y ỻawenhaa y rei hynn
o arderchaỽc dibryderỽch. veỻy yd ergryna
y rei ereiỻ o|vỽyhaf aryneic. ac megys y
byd y rei yn canu o dywededic lewenyd. veỻy
yd utta y rei ereiỻ o|r tristỽch truanaf heb
drangk heb orffen. Cas duỽ a gaffant
am geissyaỽ ỻesteiryaỽ adeilat y dinas ef
hyt y geỻynt. a|chas yr engylyon. am ge+
issaỽ ỻesteiryaỽ cỽplau eu rif ỽynteu hyt
y gaỻyssant. a chas y nef newyd a|r|daear
| « p 161 | p 163 » |