LlGC Llsgr. Peniarth 190 – tudalen 118
Ystoria Lucidar
118
ỻe kyfagos y|r issaf. ual y gaỻei bop rei gỽ+
elet y gilyd. a|r rei a|oedynt yno kynny bei
boen arnadunt. ef a|welit udunt eu bot
yn uffern. ac ef a welit yr rei a|oedynt yn
yr issaf eu bot ỽynt ym paradỽys. ac ody+
na yd erchis y kyuoethaỽc y lazar bỽrỽ
davyn o|r|dỽvyr arnaỽ. discipulus Pa ryỽ boen a|oed
arnunt ỽy yno. Magister|Tywyỻỽch e|hun me+
gys y dywedir. Goleuni a dyuu y rei a
oedynt yn kyuanhedu teyrnas kysgaỽt
angheu. ac ereiỻ y myỽn poeneu. ỽrth hyn+
ny y doeth duỽ pan anet y uffern uchaf
y rydhau y rei yd oed gythreul yn eu ỻe+
thu. Odyna pan vu varỽ y disgynnaỽd
y uffern issaf y brynu y keith y gan y
gelyn creulaỽn. megys y dywedir. Arch
di y|r rei yssyd yng|karchar vynet ymeith.
ac y|r rei yssyd yn|y tywyỻỽch yn dangos
y mae ef y uot yn galỽ y rei a|oed yn|y
poeneu yn garcharoryon. ac yn|dywet+
ut bot y rei ereiỻ yn tywyỻỽch. a brenhin
y gogonyant a|e goỻyngaỽd ac a|e duc ỽynt
y lewenyd ef.
| « p 117 | p 119 » |