LlGC Llsgr. 3035 (Mostyn 116) – tudalen 8v
Ystoria Dared
8v
ỽr kymedraỽl o gorf coch arderchaỽc kymeredic hegar.
achil oed vab y|peleus brenhin o tetis dỽywes y|moroed
oed idaỽ dỽyfron lydan ac aduỽyn·drych. ac aelodeu creu+
laỽn greduaỽl maỽr ỻathredic a gỽaỻt pengrych melyn
gỽaredaỽc ỽrth wan. deỽraf y|myỽn arueu. ac ỽyneb hyf+
ryt. a hir oed a|hael. Petroclus y vraỽtuaeth a|e getymde+
ith. oed idaỽ dỽyfron dec a|ỻygeit gleisson maỽr. gỽr
kywilydyus hyspẏs caỻ oed a hael. Eiax olileus gỽr
pedrogyl oed a chorf eryr idaỽ ac ae·lodeu greduaỽl ka+
darn a gỽr digrif oed. Aiax telamonius ỻef eglur oed
idaỽ a gỽr greduaỽl creulaỽn yn erbẏn y elynyon ac
annỽyt mul gantaỽ a briger bengrech du. vlixes
gỽr kadan* ỻawen ỻaỽn o vrat. ac ỽyneb ỻawen a|chorf
kymedraỽl kymen ac ygnat oed. Diomedes gỽr kadarn
a|chorff pedragỽl idaỽ ac ỽyneb aduỽyn creulaỽn a gỽych+
raf yn ymlad a ỻef vchel ac ymenyd tỽym drỽc a gleỽ
oed. Nestor gỽr maỽr hir ỻydan caỻ a|chnaỽt gỽyn idaỽ
Proteselaus gỽr gỽyn aduỽyn drych buan. da y ymdi+
ret drut. Neocolonus gỽr maỽr pryderus ỻidyaỽc
blosc ac ỽyneb da crỽn a ỻygeit duon ac aelodeu maỽr
Palamedes oed ỽr hir·vein claer ac ygnat maỽrurydus
Pilodarius oed ỽr bras greduaỽl syberỽ trist. Machan
oed ỽr maỽr kadarn hyspẏs caỻ ofnaỽc trugaraỽc.
Meiryon oed ỽr coch a chrof* crỽm kymedraỽl oed idaỽ
saraedus gỽydyn creulaỽn nyt oed amynedus. Bri+
sidia gỽreic a·gamemnon oed furueid nyt oed hir
a|chnaỽt gỽẏn a gỽaỻt melyn ac aeleu duon a ỻygeit
ỻathreit adfỽyn a|chrof* kyfyaỽn a dywedỽydat claer
kiwilidyus ac anỽyt mul gỽar. Pryt gỽyr troea
a damlywychỽn rac ỻaỽ. ~ ~ ~
| « p 8r | p 9r » |