LlGC Llsgr. 3035 (Mostyn 116) – tudalen 78v
Brut y Brenhinoedd
78v
Ac veỻy dyuynu attaỽ hoỻ wyrda y|teyrnas A gỽedy eu
dyuot ygyt rannu vdunt a gynuỻassei o eur ac aryant
a|da araỻ A|menegi vdunt y vot ef yn mynet y gantunt
y agheu A|phaỽb onadunt ỽynteu yn griduan ac yn dryc+
yruerth. Ac ynteu yn eu didanu ỽy. Ac yn eu kyghori.
An* yn annoc y|r gỽyr jeueinc deỽr bot yn ỽraỽl fynedic
y ymlad dros eu gỽlat. Ac y amdiffyn eu teyrnas rac gor+
mes estraỽn genedyl. Ac gỽedy eu hanoc veỻy yn her+
wyd y|gaỻei erchi a wnaeth dineu delỽ euydeit drỽy
danaỽl geluydyt a|e gossot yn|y borthua y gnotaei y
saeson diskynu y|r tir A gỽedy y bei varỽ ynteu y iraỽ
ac ireideu gỽerthuaỽr a gossot y gorff ar y delỽ hono
yr aruthred y|r saeson Ac ef a dywedei werthefyr ven+
digeit hyt y gỽelynt ỽy y delỽ hono a|e gorff ef arnei
na leuessynt ỽy dyuot y tir ynys prydein. kanys ef
a gredei na leuessynt dyuot ar y torr ef yn varỽ. Y
gỽr a|r wnathoed vdunt yn|y vywyt y genifer defnyd
ofẏn ac aruthred a|r|wnathoed ef. Ac eissoes gỽedy y
varỽ kygor oed waeth a|wnaethant ỽy cladu y gorff
A gỽedy marỽ gỽerthefyr [ ef yn ỻundein ~
vendigeit y doeth gỽrtheyrn gỽrtheneu y gyfoeth
drachefyn. A gỽedy kaffel o·honaỽ y vrenhinya+
eth o arch ac anoc y wreic. Anuon a|wnaeth hyt yn ger+
mania y erchi y hengyst dyuot drachefyn y ynys pry+
dein yn yskaualaf ac y gaỻei o nifer rac ofyn teruys+
gu eilweith yrydunt a|r brytanyeit Ac yna pan gig+
leu hengyst ry varỽ gỽerthefyr vendigeit kynuỻaỽ
a oruc ynteu trychan mil o|wyr aruaỽc a chywei+
raỽ ỻyges Ac ymchoelut dra|y|gefyn y ynys prydein
A gỽedy gỽybot o|r brytanyeit ry dyuot nifer kymeint
| « p 78r | p 79r » |