LlGC Llsgr. 3035 (Mostyn 116) – tudalen 63r
Brut y Brenhinoedd
63r
yant a chyfoeth. hyt nat oed haỽd kaffel neb a vei arnaỽ
y|ofyn na|e eryneic Ac o hynnẏ aỻan y kynhelis eudaf
ynys prydein hyt yr amser y buant gracian a valaỽn
yn amherodron yn rufein.
A c yg|kylch diwed y oes ymgygor a|wnaeth eudaf
A|e wyrda py wed yd adaỽhei y gyfoeth gỽedy ef
kanyt oed etiued idaỽ namyn vn verch a rei a
gyghorei idaỽ rodi y verch y vn o|dylyedogyon rufein
a|e deyrnas genti mal y geỻit kynhal yr ynys yn
gadarn ac yn dagnefedus rac|ỻaỽ. Ac ereiỻ. A|gyg+
horei idaỽ rodi y verch y vrenhin o|wlat araỻ. A|diga+
ỽn o eur ac aryant genti A rodi y gyuoeth oỻ gỽedy
ynteu y gynan Meiradaỽc nei y eudaf Ac eissoes
y|kyghores karadaỽc jarỻ kernyỽ y|r brenhin gỽahaỽd
attaỽ Maxen wledic a rodi idaỽ y verch a|r kyfoeth gỽedy
ef genti. Ac o|hynny y tybygei ef kaffel tragywydaỽl
hedỽch. kanys mab oed vaxen y lywelyn ewythẏr elen
luydaỽc Megys y|dywespỽyt vchot y vynet o|r ynys hon
y·gyt a|chustenin vab elen A|mam vaxen a|hanoed o dyly+
edogyon rufein Ac yno y ganydoed ynteu Ac ar vyrder
o vrenhinaỽl genedyl o vam a|that yd hanoed. A chyn ̷+
hyruu y ỻys yn vaỽr a wnaeth kynan Meiryadaỽc nei
y brenhin o achaỽs rodi o|r iarỻ y kygor hỽn y|r brenhin
kanys y vryt ef a|e vedỽl oed ỽrth y vrenhinyaeth Ac
jrỻaỽn yd edewis y ỻys Ac yna eissoes sef a wnaeth
karadaỽc jarỻ kernyỽ anuon meuryc y vab hyt ẏn
rufein y venegi hynnẏ y vaxen. Sef y|kyfryỽ ỽr oed
veuruc Gỽas maỽr tec telediỽ clotuaỽr o deỽred a
haelder A|phy beth bynac a|dywettei ar y dauaỽt
ef a|katarnhaei o|e weithret a|e arueu. A gỽedẏ dy+
| « p 62v | p 63v » |