Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 61v

Brut y Brenhinoedd

61v

gleỽ oed hỽnnỽ a gỽr a|lafuryei yn vỽy no neb y achwanegu
kyfreith kyfredin arglỽydiaeth rufein A phan gigleu. goel
bot y gỽr hỽnnỽ yn dyuot y ynys prydein ofynhau a|oruc
ymlad ac ef kan clyỽssei nat oed neb a aỻei gỽrthỽyne+
bu idaỽ Ac ỽrth hynny pan doeth constans y|r tir. Sef
a wnaeth koel anuon attaỽ y erchi tagnefed Ac y|gynnic
darystygedigaeth idaỽ o|ynys prydein. gan adu koel
yn vrenhin a|thalu y gnotaedic teyrnget y wyr rufein
A gỽedy datkanu hẏnnẏ y gonstans y rodes tagne+
fed vdunt. Ac y kymerth gỽystlon y gan y brytanyeit
ar hẏnnẏ A chyn pen y|mis gỽedy hẏnnẏ y clefychỽys
coel o ỽrthrỽm heint. A chyn pen yr ỽythuet dyd y|bu
A  gỽedy marỽ koel y kymerth [ [ varỽ coel.
constans coron y teyrnas. Ac y kymerth vn verch
oed y koel yn wreic jdaỽ. Sef oed y|henỽ elen verch
koel. A|honno vu elen luydaỽc Ac ny chahat yn yr y+
nyssed a gyffelypei y|r vorỽyn honno o|bryt a|thegỽch
Ac nyt oed yg|keluydodeu a gỽybot y chyfelyb. kanys
y|that a baryssei y|dyscu veỻy ỽrth nat oed etiued idaỽ
namyn hi. mal y bei haỽs idi lywyaỽ y teyrnas gỽedy
ef. A gỽedy kymryt o gonstans hi yn wreic idaỽ y|ga+
net mab vdunt. Sef oed y|enỽ gustenein Ac ym|pen
dec mlyned gỽedy hynny y bu varỽ constans ac y|cla+
dỽyt yg|kaer efraỽc Ac yd edewis y vrenhinyaeth y
gustenin. Ac ym|pen ychydic o yspeit blỽynyded ym+
dangos a oruc custenin o vot yndaỽ boned maỽr a|dy+
lyet ac ymrodi y haelder a dayoni a gỽneuthur jaỽn+
der yn|y ar·glỽydiaeth. Ac ymdangos mal ỻeỽ dywal
yn|y arglỽydiaeth y|r rei drỽc a megys oen vufyd
y|r rei da fydlaỽn.