LlGC Llsgr. 3035 (Mostyn 116) – tudalen 34r
Brut y Brenhinoedd
34r
tus o achaỽs y vudugolyaeth honno trist eissoes oed am
lad turn y|nei. A bot y niuer beunyd yn ỻeihau a|e elyn+
yon yn amlahu Ac yn betrus gantaỽ o|r diwed pa diỽ
y|damweinei y vudugolyaeth. Sef a gauas yn|y gẏgor
tra vei y ran vỽyaff o|e lu gantaỽ yn jach mynet yn|y
logeu gan glot y|vudugolyaeth honno. Ac o|gyt·gygor
yd aethant y eu ỻogeu A|ỻenwi eu ỻogeu o|pop ryỽ
da a golut. Ac y·gyt|a rỽyd wynt y doethant y|r ynys
a|oed adawedic vdunt drỽy dỽywaỽl ỽrtheb y borth
A |r amser hỽnnỽ y gelwit hi y [ totneis y|r tir. ~
wen ynys a|diffeith oed eithẏr ychydic o|geỽri
yn|y chyfanhedu. tec oed y hansaỽd o auonoed
tec a|physgaỽt yndunt a|choedẏd a bỽystuileit yn+
dunt yn amyl a bodlaỽn vuant y|r ỻe y bressỽylyaỽ
yndi. A gỽedy gỽelet o|r keỽri ỽynt yn damgylch+
ynu yr ẏnẏs. FFo a wnaethant y ogofeu ẏ|mẏnẏded
Ac yna gan ganhyat brutus y rannỽyt yr ynys ac
y|dechreuỽyt diwyỻaỽ y|tired ac adeilat tei. Ac yn
ychydic o amser gỽneuthur diruaỽr gyfaned yndi
Ac y|mynỽys brutus galỽ yr ynys o|e enỽ ef bry+
taen a|r genedyl yn vrytanyeit Ac o hyny aỻan
y jeith a elwit gynt jeith dro neu gamroec a|elwit
gỽedy hẏnnẏ brytanec Ac o|r dysc hỽnnỽ y|mynỽys
Corineus galỽ y ran ynteu o|r ynys kernyỽ a|r bobyl
yn gorneuic kanẏs pan ranỽyt y kauas corineus de+
wis ac y dewissỽys y ran honno kanẏs yno yd oed am+
laf y keỽri ac nat oed gantaỽ ynteu dim digrifach
noc ymlad a|r rei hyny Ac ym|plith y rei hynẏ yd oed
vn an·tygetuenaỽl y veint a|deudec cupyt yn|y hyt
a|chymeint y angerd ac y tynei derwen o|e gỽreid
| « p 33v | p 34v » |