LlGC Llsgr. 3035 (Mostyn 116) – tudalen 205r
Brut y Tywysogion
205r
sant ros ac y ỻosgassant y|wlat oỻ eithyr haỽlford. ac
odyno yd hỽyỻassant y wlat vorgan. a gỽedy gỽereskyn a
chael kasteỻ ỻan geneu yd ymhoelassant adref wedy ỻad
ỻawer a dala ereiỻ. ac yna y bu varỽ Maelgỽn jeuanc ac
y cladỽẏt yn|ystrat flur Y|vlỽydyn hono am·gylch gỽyl veir
yn aỽst y doeth henri vren·hin a|ỻu maỽr gantaỽ hyt yn
dy|ganỽy ac yno y|trigyaỽd hyt ỽyl veir y|medi. ac yna
yd ym·hoelaỽd y loeger yn yr amser hỽnỽ y ỻosges eglỽys
lan badarn vaỽr ac y kymydaỽd. ỻywelyn. ap gruffud. a gruffud. ap Madawc
ac y gyraỽd gruffud ap gỽenỽynỽn ar dehoỻ o|e gyuoeth
Y vlỽydyn rac·ỽyneb y|rodes kynuỻeitua o dylyedogẏon
lỽ fydlonder y. ỻywelyn. ap gruffud. dan boen yskymundaỽt ac ny
chetwis meredud ap rys y|ỻỽ hỽnnỽ namyn mynet yn|y
erbẏn yn aghywir. Y|vlỽydyn hono y bu ter·uysc yn ỻoeger
yrỽg yr estronyon am·gylch gỽyl jeuan vedydyỽr. Y|vlỽy+
dyn honno yd aeth. dauid. ap gruffud a meredud ap ywein a rys
vychan a|rys mechyỻ y ymdidan a maredud ap|rys ac a
phadric dysaỽs synyscal y brenhin yg|kaer vyrdin hyt
yn emlyn pan welas Meredud a|phadric y gỽyr ereiỻ torri
kygreir a|wnaethant a|e hachub ac yna y|ỻas padric a
ỻawer o varchogẏon a|phedyd y·gyt ac ef. Yn diwed y vlỽy+
dyn honno y|mordỽyaỽd henri vrenhin y ymdidan a brenhin
T rugein mlyned a deucant a|mil oed oet crist freinc ~
pan aeth. ỻywelyn. ap gruffud y vueỻt a dỽyn bueỻt oỻ y gan
rosser mortimer eithyr y casteỻ ac odyna drỽy ymdeith
ar draỽs deheubarth heb wneuthur drỽc y|neb yd ym+
choelaỽd y|ỽyned. ac yn|y ỻe y kauas gỽyr. ỻywelyn. o gyrch
nos heb vn er·gyt ymlad gasteỻ bueỻt a gỽedy dala
| « p 204v | p 205v » |