LlGC Llsgr. 3035 (Mostyn 116) – tudalen 186v
Brut y Tywysogion
186v
ar hyt ynys prydein oỻ a|theruyneu freinc yny varỽ an+
neryf o|r bobyl gyffredin a|diuessured o|r bonedigyon a|r
tywyssogẏon ac yn|y vlỽydyn dymhestlus hono yd ym+
dangosses antropos a|e chỽioryd y|rei a|elwit gynt yn
dỽyesseu y|tyghetuenoed y kygoruynus wenỽynic nerth+
oed yn erbẏn y veint arderchaỽc dywysaỽc hyt na aỻei
ystoriaeu ystas ystoriaỽr na|chatheu feryỻ vard menegi
y veint gỽynuan a dolur a|thrueni a doeth y hoỻ gene+
dyl y brytanyeit pan dores agheu yr emeỻtigedic vlỽy+
dẏn hono olỽẏn y|tyghetuen y|gymryt yr arglỽyd rys
ap gruffud gan y|hadaned dan darystigedic vedyant ag+
heu y gỽr a oed ben a|tharan a chedernit y deheu a hoỻ
gẏmrẏ a gobeith ac amdiffin hoỻ genedlaeth y|brytanyeit
y gỽr hỽnỽ a hanoed o vonedicaf lin brenhined ef a oed e+
glur o amylder kenedyl a grymusder y vedỽl a gyffely+
baỽd ỽrth y genedyl. kyghorỽr y dylyedogyon ymladgar
yn erbẏn kedyrn. diogelỽch y|darestygedigyon. ymladỽr
ar gerryd kyffroỽr yn ryfeloed. kyweirỽr yn|y bydinoed a|e
reolỽr. kỽympỽr y|toruoed ac megys baed yn whernu neu
leỽ yn ruthraỽ veỻy y dyỽalei y greulonder yn y|elynyon
Och am ogonyant yr ymladeu taryan y|marchogyon
ymdiffyn y|wlat. tegỽch arueu. breich y kedernit. ỻaỽ yr
haelon. ỻygeit y dosparth. echtywynỽr advỽynder. vchelder
maỽrurytrỽyd. defnyd grymusder. eil achel·arỽy o nerth
cledẏr y|dỽyuron nestor o hynaỽster. tideus o leỽder. sam+
son o gedernit. ector o pruder. erckỽlf o ỽychder. paris. o
pryt. vlixes o lauar. celyf o doethineb. aiax o vedỽl. a
grỽnwal yr hoỻ gampeu.
| « p 186r | p 187r » |