Breudwd Rhyddiaith Gymraeg 1300-1425
English

LlGC Llsgr. 3035 (Mostyn 116) – tudalen 137v

Brut y Brenhinoedd

137v

hywel. mab. emyr|ỻydaỽ y gỽr a|weresgynỽys y|teyrnassoed
gyt ac arthur. Ac o hỽnỽ y|ganet alan. o alan hywed dy
dat titheu. Y gỽr hyt tra vu vyỽ a dyborthei yn vỽyaff
o|r tywyssogyon y hoỻ freinc ofyn yn wastat. 
A c yno y·gyt a selyf y gayaf hỽnỽ y bu katwaỻaỽn
Ac oc eu kytgygor y goỻygassant breint bir* y|ynys
.prydein. y geissaỽ os kanhattei duỽ idaỽ o neb ford kaffel
ỻad dewin etwin rac ỻesteiraỽ ohonaỽ o|e genefodic
oe* gelfydyt y gatwaỻaỽn dyfot y|r tir A gỽedy dyfot
breint y borth hamỽnt y|r tir. ef a gymerth gỽisc reu+
dus ym·danaỽ. Ac yn rith achenaỽc kerdet. A|pheri gỽ+
neuthur bagyl hayarn yn vlaenỻym idaỽ a|r hon
o|r damweinhei idaỽ kaffel kyffur. y|ỻadei ynteu y|dewin
Ac odyna y|kerdỽys breint parth a chaer efraỽc kanys
yno yn|yr amser hỽnnỽ yd oed y|dewin gyt ac etwin. Ac
mal y deuth y|r dref ym·gymysgu a|r reudusson a oruc
y rei a|oedynt yn aros alwissen ym porth ỻys y brenhin
Ac mal yd oed vreint yn treiglaỽ ym|plith y|reudusson
na·chaf chỽaer idaỽ yn dyfot aỻan o|r|ỻys a|phayol yn|y
ỻaỽ yn kyrchu dỽfỽr y|r vrenhines. a hono a dugassei
etwin o gaer waragon gỽedy dehol katwaỻaỽn A|phan
yttoed hono yn kerdet heb laỽ breint adnabot y|chwaer
a oruc ac ỽylaỽ Ac yn issel galỽ arnei Ac ysef a oruc
hitheu trossi y hỽyneb attaỽ Ac yn gyntaf petrussaỽ
pỽy oed. A gỽedy dynessau attaỽ ac adnabot y braỽt
A megys hayach ỻywygu o yrdanc rac ofyn y|adnabot
o|e alon a|e dala A gỽedy karedigyon gussaneu a geireu
rybuchedic ar vyr·der megys yn rith ymadraỽn* araỻ
hi a venegis idaỽ y|dewin yd oed yn|y geissaỽ. Ac a ve+
negis idaỽ ansaỽd y ỻys. kanys yna y dothoed y|dewin
y|orymdeith