LlGC Llsgr. Llanstephan 27 (Llyfr Coch Talgarth) page 127r

ỽynt ac eu ỻynghes. a chychwynnu gỽlat yr Jdewon a|orugant

a|gỽneuthur ỻadua vaỽr onadunt. A phan gigleu brenhined

a thywyssogyon y|wlat hynny. kynhyruu a|orugant a|diar+

uodi. a|disynhỽyraỽ. a digaỻonni a dywedut. Pỽy heb ỽynt yỽ

y bobyl yssyd mor gadarn a|hynn y|n herbyn ni. Pobyl ru+

uein yỽ honn heb vn yn mynnu dial iessu yr hỽnn a gro+

gassaỽch chỽi ac a|ladyssaỽch. Yr aỽrhonn y cỽplaỽyt prof+

fỽydolyaeth balaan a dywaỽt. Ef a|dyfyra seren seren* o ia+

go. ac ef a gerda gỽialen o|r israel. ac ef a|daỽ o|r eidyal a

lado yr Jdewon. a hoỻ daear y rei hynny a vyd eidaỽ gỽyr yr

eidyal. Pan|gigleu archelaus uab eraỽdyr hynny. digaỻon+

ni a|oruc a|gossot y waeỽ yn|y daear a mynet ar y vlaen

a gỽneuthur y leith e|hun. Pilatus hagen a|ỻawer o|r Jde+

won a gyrchaỽd kaerussalem. ac a|gaeassant y dinas ar+

nunt. kanys kaeat oed yna yr yn oes esdras proffỽyt a|e

kaeassei. gỽedy distriỽ o genedyl babilon y doeth paỽb o ge+

nedyl yr idewon y·dan ieremias broffỽyt. Ac yna y gogyl+

chynaỽd titus a vaspasian y|dinas a|ỻad a gaỽssant o+

nadunt a|orugant. a thra yttoed y dinas yn|warchaedic

heuyt newyn a|ladaỽd rann uaỽr o|r Jdewon. A mynet

yng|kyngor a|orugant a dywedut. bot yn weỻ udunt eu

dihenydyaỽ e|hunein no bocsachu estraỽn genedyl oc eu

ỻadua o·honam. Ac yna y ỻadaỽd pob un ohonunt y dat.

Sef vu y riuedi a las o·nadunt trugein|mil. a|r ỻeiỻ a

drigyassant gyt a|philatus yn|y gaer yn gymeint eu neỽ+

yn ac yd|yssynt yr|hen grỽyn y ymdanunt ac eu hen ffe+

ỻych. Odyna y tyfaỽd ymodỽrd y·ryngthunt am na eỻynt

LlGC Llsgr. Llanstephan 27 (Llyfr Coch Talgarth) – tudalen 127r