Rhydychen, Llsgr. Coleg yr Iesu 57 – tudalen 28
Llyfr Blegywryd
28
y penkynyd y ỽrtheb y neb o vn dadyl dyeithyr y vn
o sỽydogyon ỻys. Ef a|geif gan gynydyon y
geỻgỽn. rann deu·ỽr o|r crỽyn. a rann gỽr gan
gynydyon y milgỽn. Pob kynyd geỻgi a|geif
rann deu·wr o|gynydyon y milgỽn. Kylch a|geif
ef ar vileinyeit y brenhin. a|r kynydyon gỽedy
rannont y crỽyn. a|r nadolic y deuant ygyt
y gymryt eu breint. ac eu|dylyet gan y brenhin
o gyfreith. Y le a vyd yn|y neuad gyfarwyneb
a|r brenhin o vyỽn y golovyn. a|r|kynydyon gan+
thaỽ. Corneit o lynn a geif gan y brenhin. ac
araỻ gan y vrenhines. a|r trydyd gan y distein
neu y penteulu. Seic a chorneit o lynn yn|y
ankỽyn a|geif yn|y letty. Ef a|geif traean dirỽy+
eu a chamlyryeu. ac ebediỽeu. a|gobreu merchet
y kynydyon. Gyt a|r brenhin y byd y kynydyon
o|r nadolic hyt yny dechreuont hely ewiged y
gỽ˄annỽyn. ac yna tra helyont y kaffant gylch
ar vileinyeit y brenhin. ac ueỻy yn hydref tra
helyont geirỽ. o|r pan|dechreuont hely hyt naỽ+
| « p 27 | p 29 » |