Breudwd Rhyddiaith Gymraeg 1300-1425
English

Rhydychen, Llsgr. Coleg yr Iesu 57 – tudalen 114

Llyfr Blegywryd

114

ny cheiff neb chwarthaỽr tir o·honaỽ. O|r ỻedir
hyd brenhin myỽn tref breyr y bore. catwet y
breyr ef hyt hanner dyd. ac o|r deuant y kynyd+
yon yna kymerent ef. ac ony deuant paret y bre+
yr y vlingaỽ. a ỻithyet y kỽn o|r kic. a|dyget y
croen ganthaỽ adref. a|r avu. a|r chwarthaỽr
ol. a|r kỽn. ac ony deuant y kynydyon y nos
honno kymeret y kic oỻ. a chatwet y kỽn a|r
croen y|r kynydyon. O|r ỻedir y karỽ hanner
dyd yn|tref breyr. kattwer ef yn gyuan hyt y
nos. ac ony deuant y kynydyon yna. gỽneler
am hỽnnỽ ual am y|ỻaỻ. Os y·gyt a|r nos neu
hyt nos y|ỻedir. tannet y breyr y vanteỻ arnaỽ
a|chatwet ueỻy hyt y bore. ac ony|deuant y
kynydyon yna. gỽnaet yn|y mod racdywede+
dic. Pỽy|bynnac a|wnel ueỻy am hyd brenhin
a|lader yn|y dref. ny byd kerydus o gyfreith.
H Elỽryaeth y brenhin hyt galan gaeaf
y byd. odyna hyt y naỽuettyd y|r kynyd+