LlGC Llsgr. Peniarth 35 – tudalen 115v
Llyfr y Damweiniau
115v
1
ammobyr idi Canyt oes a|e gouynho. ~
2
Ny dyly ynteu amobyr y uerch e hun.
3
Ny dylyir y un goholaeth ebediỽ. Sef
4
achos yỽ. herwyd y dylyet maỽr y byd
5
ryd ynteu o bob dylyet bychan. Onyt hyn
6
a| deruyd idaỽ kymryt tir o·honaỽ a mynet
7
y ureint mab uchelỽr. yr caethet hagen
8
uo y tir ef kyn rydet uyd a| thir mab uch+
9
elỽr. Ac o| hynny allan amobyr ac ebediỽ
10
a tal ynteu mal y tal mab uchelỽr. kyn
11
no hynny ny thalei namyn a talei edling.
12
Amobyr merch penkenedyl. punt. Pob
13
kyuryỽ dyn o|r a| talho amobyr. kymeint
14
uyd amobyr y uerch a|e ebediỽ e| hun. Amo+
15
byr merch penkerd a|e ebediỽ e hun o|r a es+
16
tynho arglỽyd penkeirdyaeth idaỽ. chwe
17
ugeint. Pob kerdaỽr arall onyt erlit y
18
dylyet e| hun na treftadaỽc uo nac alltut
19
y uelly y tal amobyr y uerch. a|e ebediỽ e| hun.
20
Pob penkerdaỽr o|r a estynho arglỽyd pen+
21
keirdaeth idaỽ. yr arglỽyd bieu keissaỽ
22
offer idaỽ. Nyt amgen no thelyn y un.
23
Crỽth y arall. pibeu y arall. ac wynteu
24
pan uỽynt uarỽ a dylyant eu hadaỽ yr
25
arglỽyd. Pob penkerd telyn a| dyly y gan
26
y kerdoryon ieueinc a uo vrth kerd telyn
27
a mynnu ymadaỽ a| thelyn raỽn a bot yn
| « p 115r | p 116r » |