Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 19r
Ystoria Lucidar
19r
1
yr hynn a|geis duỽ gann bop creadur doosparthus.
2
Paham y|gadei y|tat llad y|vn mab ac yn gallv
3
luddyas. Pann welas duỽ med ef y|vab yn myn+
4
nv perffeidyaỽ gweithret mor ardechaỽc* ac ym+
5
lad ar brenhin kreulaỽn. A|rydhau y caeth o|e
6
veddyant. duỽ a|gytssynnyaỽd ac ef ar y gweithret
7
molyannus hỽnnỽ. Ac a|adaỽd idaỽ varỽ. Pa|de+
8
lỽ y|bu gyfflaỽn gann duỽ rodi gwirion dros en+
9
nwir. Am dwyllaỽ o|r gwaethaf y dyn mvl. Jawnn
10
yỽ yna rodi y|gwystyl gorev drostaỽ y|warchae
11
y|gelyn. Ac y|eturyt yn diargywed y hen rydit.
12
Ac velle y dangosses duỽ yr garyat yr|byt. Megys
13
y|dywedir. Ti a rodeist dy|vab y brynnv dy|was.
14
Os ef e|hun a rodes y vab o|e vod. Beth a|bechaỽd
15
Judas yr y|rodi yntev. Y|tat a|rodes y|vab. Ar mab e
16
hun a|ymrodes yr karyat. Judas hagen a|e rodes
17
ef yr chwant da. Paham y|mynnaỽd ef varỽ ar|y
18
prenn. paham ar|y|groc. Yr prynv petwar|bann y|byt.
19
Pa saỽl aỽr y|bu grist yn|varw. deugeint. Paham
20
yr prynv pedeir|bann y|byt. y|rei hynny a|uuessynt
21
veirỽ yn|y degeir dedyf. Pa hyt y|gorwedaỽd ef
22
yn|y bed. Dwy·nos a diwarnnaỽt. Paham; y|dwy+
23
nos. a|arwydockant deu ryỽ anghev yssyd. Vn yr
24
corff. Ac vn yr eneit. Ar dyd yntev a|dengys yr
25
anghev yr hỽnn yssyd oleuni yn anghev nynhev.
| « p 18v | p 19v » |