LlGC Llsgr. Peniarth 11 – tudalen 15r
Ystoriau Saint Greal
15r
1
duỽ idaỽ. A megys y mae ryuedach campeu y daryan honn
2
noc vn araỻ. veỻy y byd ryuedach campeu y marchaỽc a|e dỽc
3
hitheu noc vn araỻ o|r byt. Arglỽyd heb ynteu kanys kystal
4
y broffỽydolyaeth honn am y daryan ac y dywedy di. manac
5
ditheu ymi pa|le y gadawyf hi. kanys mi a vynnỽn y roi hi
6
yn|y ỻe y kaffei y marchaỽc hỽnnỽ pan|delei. Je heb y Josep
7
gado di hi yn|y ỻe y paro naciens y gladu. kanys yno y daỽ
8
y marchaỽc urdaỽl y chwechet dyd gỽedy y gỽnelher yn var+
9
chaỽc. ac ueỻy y|doethost ditheu y|r uanachlaỽc yn|y ỻe y cladỽ+
10
yt nacien. Ac weldy yna heb ef gỽedy dywedut ytti cỽbyl o|r
11
wirioned am y daryan. ac ar hynny difflannu a|oruc ef
12
heb wybot nac o·honaỽ ef nac o|r|ysgỽier pa le yd aeth y ỽrth ̷+
13
unt. ac yna yr ysgỽier a|disgynnaỽd geyr bronn galaath ac
14
a|adolygaỽd idaỽ yr karyat y|neb yr|oed yn dỽyn y arueu a|e
15
arwydon ar y|adel ef yn|y gedymdeithyas o|e ganlyn. Yn ỻe
16
gỽir heb y galaath pei kymerỽn i neb y|m kanlyn mi a|th
17
gymerỽn ditheu. Arglỽyd heb yr ysgỽier a|wney ditheu yr
18
duỽ vyng|gỽneuthur i yn varchaỽc urdaỽl kanys os da gan
19
duỽ mi a|e rac·vedylyaf yn|da. Ac yna galaath rac ruclet yr
20
oed yr ysgỽier yn wylaỽ ef a dosturyaỽd ỽrthaỽ drỽy ganha+
21
du idaỽ hynny. Gan hynny heb yr ysgỽier titheu a deuy
22
drachevyn y|r uanachlaỽc. kanys yno y kaffaf|i march ac
23
arueu. a|thitheu a|dylyut dyuot yno yn ỻawen. ac nyt o|m
24
achaỽs i vy hun. namyn o achaỽs ryỽ enryued araỻ yssyd
25
yno o|e welet. a minneu a|af yn ỻaỽen heb y galaath. Ac
26
ymchoelut y|r uanachlaỽc a|orugant. a|ỻawen vuwyt ỽrth+
27
̷ ̷unt.
| « p 14v | p 15v » |