LlGC Llsgr. Llanstephan 27 (Llyfr Coch Talgarth) – tudalen 42r
Y Drindod yn un Duw, Credo Athanasius
42r
1
ac ny bu heb dywedut geir. ac eissyoes ny dywaỽt namyn un
2
geir. ac ny bu y tat a|r mab eiryoet heb garyat ac unolyaeth
3
y·ryngthunt. a hvnnỽ yỽ yr yspryt glan. veỻy y|daỽ o|r heul
4
paladyr yr|heul. ac o|r heul a|r paladyr y daỽ gỽres. a|hynny
5
gogyfoet ynt. dieithyr nat ynt vn anyan diwahan ual y te+
6
ir person. Veỻy heuyt y daỽ nant o ffynnaỽn. ac o|r ffynna+
7
ỽn a|r|nant y daỽ ỻynn. ac yr hynny un dỽfyr yỽ|r tri di·wa+
8
han hynny. dieithyr nat ynt o·gyfoet. kanys kynt y byd y
9
dỽfyr yn|y ffynnaỽn ac yn|y nat* noc yd|a yn ỻynn. vrth hynny
10
nyt oes dim yn|yr hoỻ bechaduryeit kyffelyb na thebic o
11
gỽbyl y|r vn duỽ a|r teir person. ac eissyoes pỽy bynnac a
12
dyaỻo yn amlỽc yr|hynn a|dywetpỽyt am eneit dyn ac am|y
13
creaduryeit ereiỻ. haỽs yỽ welet a|chredu pa|wed y mae y tat
14
a|r mab a|r yspryt glan yn|deir person dosparthus. ac yn un duỽ.
15
Mal hynn y digaỽn y tat a|r mab a|r yspryt glan
16
vot yn un duỽ. nyt amgen noc yn wir dipetrus.
17
P *ỽy bynnac a vynno iachau y eneit a|e gorff. reit yỽ
18
idaỽ ef yn|gyntaf peth. kynnal ffyd gyffredin eglỽys
19
iessu grist. kanys pỽy|bynnac ny|s|kynhalyo hi yn gyfyaỽn
20
ac yn|diuei diogel yỽ idaỽ y kyỻ y eneit a|e|gorff yn|dragy+
21
wydaỽl. ffyd gyffredin eglỽys grist yỽ. credu ohonam ni y|r
22
un duỽ yn|y drindaỽt. a|r drindaỽt yn vn duỽ. a|e hanrydedu
23
yn vuyd ac yn garedic. Sef yỽ hynny credu y|r vn duỽ yn
24
deir|person. a|r teir|person yn un duỽ. Ac eissyoes ny dylyỽn
25
ni yr hynny credu bot y tat a|r mab a|r yspryt glan yn vn
26
person diwahan ual y maent yn vn duỽ. na chredu eu bot yn
27
tri duỽ ual y maent yn deir person. Ac ỽrth hynny. amgen
The text Credo Athanasius starts on line 17.
| « p 41v | p 42v » |