LlGC Llsgr. Peniarth 32 (Y Llyfr Teg) – tudalen 159
Llyfr Iorwerth
159
1
a|chatwet a honno ef. Ysgrybyl gỽyỻt a|dylyir
2
eu daly y eu gỽarchae y myỽn buarth aỻan.
3
ac ysgrybyl dof a dylyant eu gỽarchae y|my+
4
ỽn ac aỻan. ac o|r byd ysgrybyl y deudyn na
5
chymysger. ac o|r dodir ygyt; rỽymher pob
6
vn onadunt. Moch nyt iaỽn eu rỽymaỽ. na+
7
myn eu gỽarchae. Y ieir a|r gỽydeu; iaỽn yỽ
8
eu rỽymaỽ yn eu daly. O|deruyd y dyn erchi gỽ+
9
ystyl am yt ar oet dygỽyd; ny dyly y rodi
10
namyn ar oet gỽystyl yt. ac ny dygỽyd hyt
11
galan gaeaf. Pỽy bynnac a|dylyo yt ar vach
12
ae am lỽgyr ysgrybyl y kynhaeaf. ae o brynu.
13
ac na|s gouynho hyt galan gaeaf. ny|s dyly.
14
Sef achaỽs na|s dyly; ỽrth y vynet yn tymor
15
nat iaỽn y ovyn. kannyt iaỽn gouyn yt y
16
vlỽydyn yn|y gilyd. Pỽy bynnac a dalyo ys+
17
grybyl; ac o|e daly ef gỽneuthur kyflauan o|r
18
ysgrybyl. py gyflauan bynnac vo. y deilyat
19
bieu y dalu. kan dyly yr ysgrybyl dyuot heb
20
haỽl heb arhaỽl. namyn talu y|r deilyat y
21
eissiwet. Pỽy bynnac a dalyo ysgrybyl; kyt
22
as goỻygho y bori; ny chyỻ y vreint yr gỽneu+
23
thur gỽeỻ no|r iaỽn. Pỽy bynnac a|dalyo ys+
24
grybyl ac eu didor hyt adref. ny dylyir dim
25
udunt; kanny dylyir deu daly am yr vn ỻỽgyr.
26
Pỽy bynnac a dalyo ysgrybyl; a|gỽrthot gỽystyl
| « p 158 | p 160 » |