LlGC Llsgr. Llanstephan 27 (Llyfr Coch Talgarth) – tudalen 3r
Ystoria Lucidar
3r
1
y goleuni. discipulus A dywaỽt duỽ hynny o eiryeu. Magister Nac ef namyn
2
trỽy y geiryeu hynny y dangossir yni eu goruchel natur
3
ỽy am eu galỽ yn oleuni. discipulus Pa natur yỽ vn yr engylyon. Magister
4
Tan ysprydaỽl. megys y dywedir. Ef a|wnaeth yr engylyon
5
o|fflam dan. discipulus A oes enweu y vihangel. a gabriel. a Raphael
6
am·gen no hynny. Magister ys mỽy y maent ỻyssenweu. kanys o
7
damchwein y gelwis dynyon ỽynt veỻy. ac nyt oes briaỽt y|r
8
enweu hynny yn|y nef udunt ỽy. a|r angel kyntaf o dam+
9
chwein a|elwit sathan. Sef yỽ hynny gỽrthwynebỽr y duỽ. discipulus
10
Dywet ym pa beth y bu gỽrthwynebỽr ef y duỽ. Magister Pan weles
11
ef y vot yn ragori rac holl radeu yr engylyon o ogonyant a
12
thegỽch gan dremygu paỽb ef a|aruaethaỽd ymogyfuchaỽ
13
a|dvỽ. neu vot yn vỽy noc ef. discipulus Pa delỽ yn ogyfuch neu yn vỽy.
14
Magister Ef a|vynnassei gymryt ansaỽd a vei weỻ noc a|rodassei
15
duỽ idaỽ. a|e gyfrannu ac ereiỻ drỽy greulonder o anuod
16
duỽ. a bot yn arglỽyd arnadunt. discipulus Beth wedy hynny. Magister
17
O baleis ỻys nef efo a gỽympwyt a|e vỽrỽ y|r carchar issaf. a Me+
18
gys yd oed deckaf ef gynt. veỻy y gỽnaethpỽyt yn duaf wedy
19
hynny. ac megys yd|oed loewaf ef gynt. y bu dywyỻaf wedy hyn+
20
ny. ac megys yd oed volyannussaf ef gynt o bop anryded. gỽedy
21
hynny y bu ysgymunedickaf o bop kyfeilyorn. discipulus A|wybu ef y dy+
22
gỽydyei. Magister Peỻ iaỽn. discipulus Pa hyt y trigyaỽd ef yn|y nef. Magister Ny
23
bu hanner vn aỽr. kanys ny safaỽd ef yn|y wirioned. ac ueỻy
24
pan wnaethpwyt ef a|dygỽydaỽd. discipulus Paham na|bu ef hỽy no
25
hynny yno. Magister Rac gỽarchadỽ ohonaỽ dim o|r melyster o vyỽn.
26
ac ynteu yn keissyaỽ o dreis medyant kymeint a hỽnnỽ mor
27
ebrỽyd a hynny. discipulus Pa beth a bechaỽd yr engylyon ereiỻ. Magister
| « p 2v | p 3v » |