Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 226r

Ystoria Bown de Hamtwn

226r

908

ỽynt yd oed pymtheg|mil o wyr aruaỽc. a|gyrru
eu meirch a|orugant megys gỽyr kyndeiraỽc.
ac ny orffỽyssassant yny doethant y|r|dref trỽy
distriỽ y wlat heb trugarhau ỽrthunt o dim.
Ac yn vore y kyuodes boỽn. a|chybot* a|oruc y son.
a|phan|wybu ef yr ystyr. ef a|orchymynnỽys
y|wyr gỽiscaỽ eu harueu. gỽelet a|oruc y lluru+
geu a|r helmeu yn discleiraỽ. ac y|gỽiscaỽd yn+
teu y gledyf. ac ysgynnu a|orugant ar eu meirch.
ac ysgynnu yn gyntaf a|oruc boỽn ar arỽndel.
a chyt ac ef terri marchaỽc clotuorus. ac ym
blaen achuc y sore a|e daraỽ yny hoỻtes y dary+
an. ac yny baỻỽys idaỽ y luruc. ac yny aeth
ynteu y|r ỻaỽr yn uarỽ. Ac yna terri a|achuba+
ỽd a|thrỽy uaỽred y daraỽ yny dygỽydaỽd yn
uarỽ y|r|ỻaỽr. Ac yna y|dodes boỽn cri ac yd erch+
is y varchogyon clotuorus ac eu cledyfeu aỽ+
chus taraỽ dyrnodeu da. a|phob un yn mynet
dros y|gilyd. a maỽr uu yr ymlad gan y kadeu
trymyon. niuer y|dref a|enniỻaỽd y maes. a|r
rei ereiỻ a|gilyassant y ystlys brynn. ac o ula+
en y niuer y marchockaaỽd boỽn a|therri.
ny bu hỽyra. ef a|ladaỽd agos y deugein. ac
yna boỽn a ymlityaỽd duc uascal. a|phan ym+
choelaỽd penn y uarch att boỽn. ef a dorres bo+
ỽn y waeỽ yndaỽ heb odric. ac yny aeth ynteu
y|r ỻaỽr. Ac yna tynnu morglei y gledyf ar
uessur ỻad y benn. ac yna erchi trugared a|oruc
c* ystynnu y gledyf att boỽn. ac ynteu a|e kymerth.
ac odyna yd|ymlidyaỽd ef duc dostris. ac a|e treỽ+
is ar y luruc dyrnaỽt maỽrbraff. ac ar yr
helym yr eil dyrnaỽt yny torres yn deu. ac yny
dygỽydaỽd ynteu yn uarỽ. Tec oedynt y bydino+
ed a|orchyuygaỽd boỽn. ac ar hynny y teruy+
naỽd y urỽydyr. ac yna yd aethant y|r ỻys. ac
eu bỽyt a gymerassant. a maỽr y karei boỽn
yr|unbennes uonhedic. a seith mlyned y|buant
y·gyt. ac ny bu gyt cnaỽtaỽl y·ryngtunt mỽy
no chynt. A dyd·gỽeith mal yd oedynt ueỻy ga+
lỽ a|oruc yr unbennes ar boỽn. a|debygy di
heb hi kaffel uy hoỻ ewyỻys i ual hynn. Ef

909

a|r aỻei im y gaffel heb·y boỽn. Weithon
tewi a|wnaỽn am boỽn. a menegi am saba+
oth. nyt amgen no dyuot gỽaret idaỽ o|e
gleuyt y diolỽch y duỽ. a galỽ ar iosian a|oruc.
a dywedut. ni a aỽn y geissaỽ vy arglỽyd heb ef.
Jaỽn y dywedy heb hitheu. Ac yna ysgynnv
a|orugant ar eu meirch a|r fford a gerdassant.
a dyuot a|orugant diwarnaỽt am aỽr osper
y dinas urdedic a|elwit amulis. gỽedy keissaỽ
eu harglỽyd ar|draỽs yr hoỻ urenhinyaeth.
ac yn|ty ỽr da o|r dinas. kymryt eu ỻetty a|oru+
gant. ac yna yd|aeth sabaoth y|r|ỻys. A phan
deuth y myỽn. kyntaf dyn a|welas boỽn yn
eisted ar ueinc. a chyr y laỽ y wreic vỽyaf a
garei yn|yr amser hỽnnỽ. kany wydyat dim
y ỽrth iosian. a chyrchu attaỽ a|oruc a|chyuarch
gỽeỻ a|oruc yn|y mod hỽnn yman. arglỽyd
duỽ a|th iachao|di ac|a|gerych. Ac yna y go+
fynnaỽd boỽn ỽrth sabaoth. pa le y|th anet
ti. Arglỽyd heb ynteu pererin o urenhinya+
eth araỻ ỽyf|i. ac yn|y dinas hỽnn yd ỽyf ys
dydyeu. a|dyuot attat ti y erchi nerth yr duỽ.
a thitheu uyg|karedic heb·y boỽn a|geffy|diga+
ỽn. a galỽ a|oruc ar terri a|dywedut ỽrthaỽ.
a|wely di tebycket y pererin y sabaoth. a|dyro
uỽyt idaỽ. Mi a rodaf digaỽn itt heb ynteu
gan debycket ỽyt y|m|tat. Duỽ a|diolcho itt heb+
y sabaoth. ef a|dywedit y|m|gỽlat dy uot ti
yn uab ymi. ac yna y diolches terri y duỽ
welet y dat. a redec att boỽn. a dywedut ỽrthaỽ
y mae sabaoth oed y pererin. Ac yn gyflym
yd achubassant attaỽ. ac yd amouynnassant
ac ef am iosian. ac ynteu a dywaỽt y gỽydat
chỽedleu y ỽrthi. a menegi y bot yn|ty ỽrda
yn|y dinas yn|ỻetty. Ac yna mynet a|oruc
boỽn a|therri a|sabaoth ˄tu a|e ỻetty hi. a hitheu
a ymolches o|r ỻiỽ a|oed erni. yny ytoed yn|y
ỻiỽ e|hunan. A phan|doeth boỽn a|therri
etti. y chymryt a|orugant a|e|harwein gyt
ac ỽynt. hyt att y dukes. a phann y gỽelas
y dukes hi mor dec ac y gỽelas ac mor adfỽyn