NLW MS. Peniarth 11 – page 246v
Ystoriau Saint Greal
246v
ac a|wydyat lawer y ỽrth ryuel. A|mỽy oed yndaỽ o gywirdeb
noc yn neb. arthur yna a|beris y alỽ geyr|bronn. ac a|dywaỽt
ỽrthaỽ. mỽy yỽ vy ymdiret i ynot ti noc yn neb. ac am|hynny
adolỽyn yỽ gennyf ytt vynet drossof yr angenn hỽnn me˄gys
yd aethost lawer gỽeith. a|mi a rodaf ygyt a|thi deugein o var+
chogyon urdolyon heb a|e kanhymdao. Arglỽyd heb·y laỽnslot
yn|erbyn dy ewyỻys di ny bydaf|i. Eissyoes y|mae yn|dy|lys di
wyr yssyd weỻ no|myui ac yssyd gadarnach o|e hanuon yno.
ac nyt yr ỻyvyrder o|r byt yr wyf|i yn dywedut hynny. a|phara+
ỽt ỽyf|i y wneuthur dy ewyỻys di. a|r|brenhin a|diolches idaỽ
hynny yn vaỽr. Laỽnslot a gychwynnaỽd o|r ỻys a|r|deugeint
marchaỽc ygyt ac ef. a|marchogaeth a|wnaethant yny doeth+
ant y dir yr alban. yn|y ỻe yd|oed magdalans gỽedy kymryt
tir. Pan wybu y wlat dyuot laỽnslot attunt ỽynt a vuant laỽ+
en. kanys ỽynt a|glyỽssynt lawer gỽeith ymdidan y ỽrth y
vilỽryaeth ef. ac am hynny uvudhau idaỽ a|wnaethant a
bot ỽrth y ewyỻys a|e gynghor. a|e erbynnyeit megys pei
brenhin arnunt uei. a|diwarnaỽt Magdalans vrenhin a|do+
eth y maes o|e longeu y|r|tir y roi bateil y|r rei o|r wlat. a|la+
ỽnslot a|e|herbynnyaỽd yn|wraỽl. ac a|ladaỽd ỻawer o|e|wyr. a ̷
rei onadunt a|oedynt yn mynnu ffo tu a|e|ỻestri. Eissyoes
neur daroed y laỽnslot torri ỻawer ohonunt. Magdalans a
doeth yn ỻedradeid y long e|hun. ac a beris eu goỻỽng y|r mor
gyntaf ac y|gaỻaỽd. a|r rei ny chafas eu ỻestri yn baraỽt ~
| « p 246r | p 247r » |