NLW MS. 3035 (Mostyn 116) – page 9r
Ystoria Dared
9r
1
P rriaf vrenhin troeaf gỽr maỽr oed ac ỽyneb tec
2
idaỽ a ỻef hynaỽs a|chorf eryr. Ector vab priaf gỽr
3
blosc oed gỽyn pengrych. ac aelodeu buan idaỽ
4
ac|ỽyneb enrydedus karedic ac adas y garyat. Dei+
5
phebus gỽr kadarn oed. Elenus gỽr doeth karedic a
6
bras oed y·ny oed debic y|tat o|furyf a|phryt ac anhebic
7
o|e anyan vam. Troilus gỽr maỽr tec oed greduaỽl a chadarn
8
ar y|oet. Alexander gỽr hir·wyn kadarn a|ỻygeit tec a
9
gỽaỻt melyn man a geneu aduỽyn a|ỻef hynaỽs. buan
10
oed a chỽnaỽc* oed y|gyuoeth. Eneas gỽr coch oed pe+
11
drogyl kymen dywedỽydat kadarn y gygor gỽar ac
12
aduỽyn a|ỻygeit maỽr duon. antenor gỽr hiruein
13
buan ac aelodeu bleuaoc a|chaỻ oed. Ecubua wreic
14
briaf. gỽreic vaỽr tec corff eryr oed ac an·ỽyt gỽraỽl
15
kyfyaỽn. a|gỽar oed. andromacca gỽreic hirwen furueid
16
a|ỻygeit eglur idi|hi a oed hynaỽs a|diweir a|chlaer oed
17
Cassandra kymedraỽl oed a geneu bychan. a|ỻygeit eglur
18
a|dehogylwreic oed yr hyn a|delei rac ỻaỽ. Polixena.
19
gỽreic hirwen furueid vynỽgylhir. ỻygeit aduỽyn a
20
gỽaỻt melyn hir. ac aelodeu kyweir a byssed hiryon|a|e
21
yskeired crynyon a thraet ỻunyeid idi yr hon o|e thegỽch
22
a|ragorei ar baỽb. annỽyt mul hael oed a|diweir. ~
23
A c yna y|deuth gỽyr goroec a|e ỻyges gantunt
24
y|r|wlat a elwit athenas yn gyntaf y deuth aga+
25
memnon o|r|dinas a|elwit mecene a|chant ỻog gantaỽ
26
a|menelaus o|r ynys a|elwit sporta a|thrugein ỻog gan+
27
taỽ. a|thelaus a|pheleas ỽynteu o uoetia y|deuthant
28
a|dec ỻog a|deu·geint gantunt. a|limerus o|r|wlat
29
a|elwit or·chomeus a|dec|ỻog ar|hugein gantaỽ. Epi+
30
tropus o|r|wlat a elwit polides a|deugein ỻog gantaỽ
| « p 8v | p 9v » |