NLW MS. 3035 (Mostyn 116) – page 103r
Brut y Brenhinoedd
103r
1
gan newitdyaỽ agheu o| pop parth. Ac o| r diwed gỽedy treu+
2
laỽ ỻawer o| r dyd y vudugolyaeth a gafas y| brytanyeit
3
Ac yn|y·d oedynt ladedigyon octa ac eoffa. dangos eu kefneu
4
a| wnaeth y| saesson ereiỻ a fo. Ac ỽrth hẏnẏ kymeint o le+
5
wenyd a gymerth y brenhin yndaỽ. A| hyt pan gyfodes
6
e| hunan yn| y eisted ar y| elor pryt na aỻei kyn no hyny
7
heb ganhorthỽy dynyon ereiỻ. kychwynu a chyn lawe+
8
net vu a| chyt ry| delhei idaỽ deissyfyt iechyt a hyny ym+
9
elỽg yn| wherthin a oruc A| chan diruaỽr lewenyd dywe+
10
dut yn vchel yr ymadraỽd hỽn a oruc. y bratwyr heb ef
11
a| m gelwynt. i. brenhin haner marỽ kanys claf oedỽn.
12
Ac ỽrth vy arwein i ar elor yn diamheu veỻy yd oedỽn
13
inheu. eissoes gỽeỻ yỽ genyf|i yn haner marỽ goruot ar+
14
nadunt. no bot yn iach ac yn vyỽ gan oruot arnaf ineu.
15
A gỽedy goruot ar y| saesson yr hyny ny pheidassant ỽy
16
ac eu tỽyỻ namyn kyrchu gogled gỽladoed yr ynys
17
Ac ymlad a| r pobyl a ryfelu arnadunt A|r rei hyny
18
a vyn·assei vthyr pendragon eu herlit pei na|s ỻudyei y
19
tywyssogyon. kanys trymach vu y| heint o| lawer gỽedy
20
hyny o| pop forff* gleỽach oedynt y gelynyon yn keissaỽ da+
21
restỽg y teyrnas vdunt Ac ymroi a orugant y eu kyne+
22
faỽt vrat ỽynt. A| medyỻyaỽ py wed y geỻynt o vrat lad
23
y brenhin A gỽedy na cheffynt ansaỽd araỻ. ỻunyaethu
24
a| wnaethant y lad a gỽenỽyn A hyny a wnaethant kanys
25
hyt tra yttoed y| brenhin yn seint|alban ỽyn a eỻygassant
26
genadeu yn rith aghennogyon y| syỻu ansaỽd y| ỻys. vn
27
peth a dewissyssant y| kenadeu y eu brat. y rei a vuassynt
28
yn ansaỽd y| ỻys. kanys yn agos y| r neuad yd oed fynaỽn
29
loyỽ. Ac o| hono y gnottaei y brenhin yfet dỽfỽr o| r pryt
30
na chaffei vlas ar diaỽt o lyn araỻ yn| y byt rac y| heint.
| « p 102v | p 103v » |