Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 68r

Buchedd Dewi

68r

a|rodes ef nyt amgen. Nyt af|i yno heb ef. ys gỽeỻ gennyf
wediaỽ duỽ yma. Eỽch chỽi heb ef yn tangneued duỽ a|e gary+
at. Ac eilweith y seint a|wahaỽdassant dewi sant. Ac ynteu a
rodes yr vn atteb ac a|rodassei gynt. A|r dryded weith o gytuun  ̷+
deb yr hoỻ seint yd anuonet att dewi yn gennadeu y deu sant
bennaf a|oed yno. Nyt amgen. deinyoel. a|dubricius. a|r nos
honno dyuot y kennadeu att dewi. a|dewi a|dywaỽt ỽrth y disgy+
blon. vy meibyon i gỽybydỽch chỽi y daỽ kennadeu yma a+
uory. Eỽch y byscotta y|r mor. a|dygỽch yma dỽfyr gloeỽ o|r
ffynnaỽn. a|r kennadeu a doethant y dyd y dywaỽt dewi ỽrth+
unt. ac ynteu a|barattoes udunt ỽy eu kinyaỽ. Disgyblon
dauyd a|rodassant ar y bỽrd rac bronn y seint pysgaỽt digoned a
dỽfyr o|r ffynnaỽn. a|r|dỽfyr a|aeth yn win ar hynt. a dauyd a
dywaỽt ỽrthunt bỽyteỽch vrodyr a gỽneỽch yn ỻaỽen. Ac yna
y dywaỽt y deu sant ỽrthaỽ. Ny chymerỽn ni na bỽyt na diaỽt
heb ỽy onyt edewy ditheu dyuot y·gyt a ninneu y|r sened uaỽr
enryued y ỻe y mae ỻu ny eỻir eu rifaỽ y|th aros. ỽrth hynny
heb ỽynt dabre y·gyt a|ni yr duỽ. ac yr bendith hynny o seint.
o·ny mynny haedu eu hemeỻdith. Heb·y dewi yna mi a|af
heb ef yr caryat duỽ att y kedymdeithyon hynny. Eissyoes heb
ef yr|hynn a|erchỽch chỽi y mi ny|s gaỻaf. myui heb ef a|gerd+
af y·gyt a|chỽi hyt y sened. a|chỽitheu gỽediỽch y tat pennaf
yny rodo ef ganhorthỽy ynni druein. a minneu a|ch gỽediaf
chỽitheu vrodyr yny gymeroch chỽitheu vỽyt a|diaỽt o|r
alussen a|r gardaỽt a rodet ynni o|r nef. A|gỽedy hynny ky+
uot a|oruc dewi ygyt a|r kennadeu y sened vrefi. a chynn eu
dyuot y|r gynnuỻeitua honno. nachaf y gỽelynt yn|dyuot yn