Oxford Jesus College MS. 119 (The Book of the Anchorite of Llanddewi Brefi) – page 44r
Ystoria Lucidar
44r
1
hỽnnỽ. megys y|dyỽedir. Ot ydiỽ ym|pechodev
2
Ac yn ediuar gantaỽ. ỽynt a|vadeuir idaỽ. onyt
3
ediuar. ny rydhaa dim idaỽ. nac y neb. A rym+
4
haa ediuarỽch yn|y diỽedglỽm. Pỽy|bynnac a
5
anotto kymryt ediuarỽch am|y bechodeu. nyt
6
wyntỽy yssyd yn ymadaỽ ar pechodeu. namyn
7
y pechodeu ac wyntỽy. kanny mynnant wynt
8
yn weisson vdunt hỽy no hynny. Pỽy|bynnac
9
yntev a|uo ediuar gantaỽ o|wir gallonn ynn
10
aỽr angheu. ef a geiff drugared heuyt yna.
11
megys y cauas y|lleidyr. Ac am hynny y|dyỽe+
12
dir. pa aỽr bynnac y dotto pechadur vcheneit.
13
ef a uyd iach. Y gann ba beth y|dyỽedir anghev.
14
y|gann chỽerỽed. neu y|gann dameit yr afual
15
gỽahardadic o|r lle y|doeth anghev a|thri ryỽ
16
anghev yssyd anamsseraỽl. megys anghev y
17
dynyon bychein. Ac anghev chỽerỽ megys vn
18
y|dynyon Jeueing. Ac anghev anyannaỽl me+
19
gys yr hen dynyon. O madeuir pechodeu yn|y
20
bedyd. Ac anghev yn boen am bechaỽt. paham
21
y|daỽ anghev yr etholedigyonn ỽedy y caont
22
vedyd. Val y bo mỽy eu gobrỽy o odef anghev
23
yr duỽ. Peth arall yỽ onny delei anghev y bop
24
dyn o|r|a vedydyit. paỽb a|vryssey y|gymryt
25
bedyd o|r achos hỽnnỽ ac nyt yr duỽ. Ac nyt
| « p 43v | p 44v » |