Breudwd Welsh Prose 1300-1425
Cymraeg

Oxford Jesus College MS. 111 (The Red Book of Hergest) – page 233v

Meddyginiaethau, Y Misoedd

233v

938

1
sef yỽ hynny mynet aỻan. pennaf kyuared
2
yỽ. kymryt fflỽr gỽenith. a|e bobi trỽy
3
uelyn naỽ wy a mel. a briỽaỽ yndaỽ bleỽ
4
dỽy·vron ysgyuarnoc. a|e graffu dan y
5
ỻudỽ. ac yuet nus buch eil al. O|r mynny
6
na|del y dannoed itt byth. y gyniuer gỽe+
7
ith yd|ymolchych. kyffro dy glusteu o|e
8
myỽn a|th uyssed. Rac y crugyn kymer
9
geilaỽc neu iar herỽyd ual y bo y dyn. ae
10
yn ỽr ae yn|wreic. a dot y din wedy|r blufy+
11
aỽ hyt pan|uo marỽ yr ederyn ỽrthaỽ. a
12
hynny a|e diwennỽyna. Pỽy bynnac a
13
uynno tynnu dauatenneu. dodet ỽrthunt
14
ỻygat y|dyd wedy briwer gyt a|thrỽnc ki.
15
ac ỽynt a|dygỽydant oỻ. Pỽy bynnac a
16
uynno diua whein. dodet y wermot yn|y
17
mor trỽy un aỽr. ac odyna dodet y sychu
18
ỽrth yr heul. A|gỽedy bont sych digaỽn.
19
a ymgyuarffo ac ỽynt o|r chwein. ỽynt a
20
vydant ueirỽ. Y diua kylyon. dotter y
21
gannwreid yn|y ỻe y gnottaont dyuot.
22
ac a ymgyfarffo o·honunt a|r ỻysseu ỽynt.
23
a|vydant ueirỽ. Rac brath neidyr. y·ver
24
sud ysgaỽ. yr hỽnn a|ỽascara yr hoỻ wenỽyn.
25
Pỽy bynnac a|goỻo y|synnỽyr neu y ym+
26
adraỽd. yuet sud y briaỻu o vyỽn y|deuuis
27
y coỻo. ac yn wir iach uyd. Pỽy bynnac
28
a vynno gỽybot beth a|uo yg|croth gỽreic
29
ueichaỽc. ae mab. ae merch. edrychet ar+
30
nei o|e heisted ac o|e|seuyỻ. ac os y|droet deheu
31
gyntaf a symut. Mab a arỽydoccaa. os yr as+
32
seu merch. O|r mynny wybot gỽahan rỽng
33
gỽreic a morỽyn. nad uaen muchud y my+
34
ỽn dỽfyr. a|dyro idi o|e yuet. ac os gỽreic vyd
35
yn diannot hi a y|bissaỽ. Os morỽyn. nyt a
36
mỽy no chynt. O|r mynny na chano y kei+
37
laỽc. ir y|grib ac oleỽ. a mut uyd. Rac
38
magyl ar|lygat. dotter yndaỽ sud eido y
39
dayar. a|r magyl a|tyrr. a|r ỻygat a|uyd
40
diargywed a|gloyỽ. Y mab bychan a dalho
41
ar wylaỽ. irer y|deu gyuys a|mer hyd. ac

939

1
anuynychach yd ỽyl. O|r byd y crugyn yn ỻe
2
perigyl ar dyn. a mynnu y symut o|e|le. ual
3
hynn y symudir. Kymerer deil ffiol y ffrud.
4
a|gỽasger o|r parth y mynner ỽrthaỽ. ac ef
5
a|ffy rac y ỻysseu uotued a hanner. ~
6
M *Js Jonaỽr na lad waet. yf deir ffioleit
7
o win ar dy|gythlỽng. Keis uedyglyn.
8
ar·uera o gic geiuyr. a ỻysseuoed da. Mis whe+
9
vraỽr eỻỽng waet ar uaỽt y|ỻaỽ asseu. keis
10
gyfleith a medyglyn. a hynny a|wna y ỻyge+
11
it yn|da. Mis maỽrth; aruera o|vỽlment.
12
ac o wreid y ỻysseu. ac o enneint. yn uynych
13
na eỻỽng waet. na chymer gyuot. kanys oeruel
14
a|uac. Yf win melys ar|dy|gythlỽg. Mis ebriỻ.
15
eỻỽng waet. kymer ysgaỽn gyuot. bỽyta gic
16
ir. ar·uera o|diaỽt tỽymyn. bỽyta dỽyweith
17
beunyd deu dameit o dauot yr hyd. gogel
18
wreid y ỻysseuoed. kanys trysgli a uagant.
19
yf y uedon chỽerỽ. Mis mei. na vỽyta dim
20
o benn. na thraet un ỻỽdyn. ar·uera o diaỽt
21
tỽymyn. bỽyta dỽyweith beunyd deu dam+
22
eit o dauot yr hyd ar dy|gythlỽng. kymer gy+
23
uot ysgaỽn ysgaỽl. aruera o ueid oer. yf sud
24
y fenigyl. a|r wermot. Mis meheuin. kymer
25
fioleit o|dỽfyr oer ar dy|gythlỽng beunyd. nac
26
yf na chỽrỽf na med. yf laeth brỽt. ys y gỽy+
27
laeth. Mis gorffennaf na|eỻỽng waet. ky+
28
mer gyuot. ar·uera o ulodeu y|ỻysseu da.
29
gogel yn|da rac godineb. Mis aỽst. aruera o
30
gaỽl. ac o lysseuoed. nac yf na chỽryf na|med.
31
kymer y pybyr gỽynn y myỽn brỽet. Mis
32
medi kymer tri ỻymeit o|laeth yn gyntaf beu+
33
nyd. pob|peth a|eỻir yna y gymryt. kanys
34
aeduet vyd y|ỻysseuoed a|r ffrỽytheu yna. a|r
35
bara yn|ỻudulyt. Mis hydref aruera o|win
36
newyd. bỽyta y pilcoes. kymer gyuot. ys gic
37
ir. a ỻysseueu da. Mis tachỽed. na chymer uehin.
38
kanys yna byd gỽaet pob dyn gỽedy keulaỽ yn+
39
daỽ yr hynn yssyd berigyl Yna y byd drỽc penneu
40
yr yscrubyl. a|r ỻysseu oỻ. Mis racuyr. nac yf
41
y kaỽl. nac ys y deil coch o|r caỽl. na|r troetynneu.
42
[ a ỻeihaa. dy waet. ~ ~

 

The text Y Misoedd starts on Column 939 line 6.