Oxford Jesus College MS. 119 (The Book of the Anchorite of Llanddewi Brefi) – page 90v
Ymborth yr Enaid
90v
1
arall berach no honno. a gỽeledigaeth a|uo per+
2
ffeithyach. Ac odyna diolỽch yr|drindaỽt gann
3
dyỽedut y|geireu vry. nyt amgen. Molyant go+
4
gonnyant. kymer hỽnnỽ yn dechreu y|lyfyr.
5
DYỽetter bellach am naỽ|rad egylyon y|nef
6
a|pha|ryỽ dynyon a|dylyer eu kyfleu ym
7
pob vn o|r gradeu hynny. Engylyon yn efrei a|el+
8
ỽir malaoth. Sef yỽ hynny o|gymraec kennadev
9
kannys kennatahu a|mynegi ewyllys duỽ a|w+
10
nant yr bobyl. Naỽ|rad a|dyỽeit yr ysgrythur
11
lan y bot o|r egylyonn. nyt amgen. Engylyon.
12
Archegylyon. kadeiryev. Arglỽydiaetheu.
13
Tyỽyssogaetheu. Medyannev. Nerthoed. Che+
14
rubin. A seraphin. Engylyon a|vanagant y|dy+
15
nyon negesseu bychein a|ry|archer vdunt y|my+
16
negi. A|chyt ac ỽynt y|kyfleheir dynyon a|ỽyp+
17
pont ychydic o betheu dỽyỽolyon. Ac a|dyscont
18
hynny yn garedic drugaraỽc y ereill. Archeg+
19
ylyon tyỽyssogyon yr egylyon ynt. kannys y
20
petheu mỽyhaf a|vanagant. A|rei ohonunt a
21
gaỽssant enỽev vrth y|gỽassannaethev. megys
22
y|rei hynn. Michael. Gabriel. Raphael. Mihangel
23
a|gyfyeithir. vn megys duỽ. neu aallu duỽ.
24
hỽnnỽ a anuonir yr lle y|bo gỽyrtheu. neu eres
25
betheu. Gabriel a|gyfyeithir yn gedernyt duỽ.
| « p 90r | p 91r » |