BL Additional MS. 19,709 – page 23v
Brut y Brenhinoedd
23v
1
a|r vydin honno a oed anreithedic o|r parth a+
2
raỻ gan ruthur gỽyr rufein. ac yna rac ky+
3
warsagedigaeth y kiỽdaỽtwyr e|hun ny aỻỽys
4
sefyỻ y·rydunt. ac ỽrth hynnẏ ynyd oedynt
5
wasgaredigyon y getymdeithon adaỽ y|maes
6
a oruc. kaswaỻaỽn a ffo. ac yn agos udunt
7
yd oed mynyd karregavc. ac ym pen y mynyd
8
yd oed ỻvyn coet tev dyrys a hyt yno y|ffo+
9
es kaswaỻavn. a gvedy y dygỽy y|dygỽydaỽ yn
10
y ran waethaf o|r ymlad a chaffel pen y|mynyd
11
a|e oruchelder gỽrthỽynebu yn vraỽl y eu ge+
12
lynẏon a oed yn eu hymlit gan geissaỽ drigy+
13
aỽ ar eu tor. ac eissoes serthet y|mynyd a|e
14
drysbch o gerric a|choet a uu amdiffyn y|r bry+
15
tanyeit mal y gvnaethant aerua diruaỽr oc
16
eu gelynyon. ac yna sef a oruc vlkessar gossot
17
y lu ẏgkẏlch y|mynyd y warchadỽ rac dianc
18
neb o·dyno. kanys y vedỽl oed argymeỻ y bry+
19
tanyeit a|r brenhin y darestỽg idaỽ drỽy newẏn
20
yr hvn ny aỻassei y gemeỻ drvẏ arueu ac ym+
21
lad. O|enryfed genedyl y brytanyeit a|gymheỻas+
22
sant dvy·weith y gvr hvnnv ar ffo yr hỽn ny aỻ+
23
vys yr hoỻ vyt gỽrthỽynebu idaỽ. ac vynteu
24
yr aỽrhon yn ffoedigyon rac hỽnỽ. ac eissoes
25
yn gỽrthỽynebu idaỽ yn vravl. ac yn baraỽt
26
y diodef agheu dros eu gvlat a|throstunt e|hune+
27
in. ac ym|pen yr eil dyd gỽedy gỽarchae kaswa+
28
ỻaỽn ym|pen y|mynyd hvnnv. ac nat oed na
29
bỽẏt na diaỽt ofynhau a oruc kaswaỻavn
30
rac newẏn. bot yn dir idaỽ ym·rodi yg|karchar
| « p 23r | p 24r » |