NLW MS. Peniarth 11 – page 58r

y yspeilyaỽ ynteu a|wisgaỽd ymdanaỽ diỻat ereill ~

A C yna laỽnslot a|esgynnaỽd ar gevyn assen. ac a var+

chocaaỽd honno yny doeth y ymyl ffynnaỽn deckaf o|r a

welsei eiryoet. Ac yna dissgynnv a|wnaeth ar vedyr yuet diaỽt

o|r dỽfyr. A|phan yttoed ef yn mynnu y·uet y dỽfyr. y ffynna+

ỽn a|gilyaỽd yn gyn|beỻet y ỽrthaỽ ac na aỻei ef gaffael dim

ohonei. A|phan weles ef na aỻei gael dim o|r dỽfyr. ef a ymchoela+

ỽd drachevyn y|r|ỻe yd|oed gynt. Ac odyna ector a|welei y uot

yn kerdet y vyny ac y|waeret yny doeth y ty gỽr kyuoetha+

ỽc yr hỽnn a|oed yn kynnal neithyaỽr. Ac yna ef a erchis yn

y drỽs agori. a|r gỽrda e|hun a doeth y|r drỽs attaỽ. ac a|dywaỽt

ỽrthaỽ. Tydi uarchaỽc urdaỽl heb ef keis di ỻetty yn ỻe a+

raỻ amgen no hỽnn. canys ny daỽ yma neb y letyu a vo kyfy+

ỽch ganthaỽ y uarchogyat a|e valchder a|thy·di. Ac ynteu yna

a|ymchoelaỽd drachefyn hyt y syarret o|r ỻe y kychỽynnassei o+

honaỽ. am y breudwyt hỽnn y kymmerth ector an·esmỽyth+

dra maỽr arnaỽ. Ac yna deffroi a|oruc a|throi o|r ystlys py gi+

lyd. a gỽalchmei yna a|oed wedy deffroi o achaỽs y vreudwyt

ynteu. ac ef a|glywei ector wedy ymdroi. a|govyn a|oruc ef

y ector a|yttoed ef yn kysgu. Nac yttỽyf arglỽyd heb ynteu.

kanys mi a|deffroeis a|deffroeis yr aỽr·honn o achaỽs breudwyt

a|weleis. Myn vyng|cret heb·y gỽalchmei veỻy y daruu y min+

neu. ac wyntỽy yn ymdidan ueỻy ỽynt a|welynt yn dyuot y

myỽn drỽy drỽs y|capel ỻaỽ y·gyt ac a|berthynei hyt ym|penn

yr elin. ac yng|kroc ỽrth y|ỻaỽ yr oed ffrỽyn yr honn nyt oed

na thec nac odidaỽc. ac yn|y ỻaỽ yd|oed tors o gỽyr yn ỻosgi.