LlGC Llsgr. 3035 (Mostyn 116) page 183v

o gerd arwest. a gỽyr gỽyned a gauas y vudygolyaeth o

gerd dauaỽt a|phaỽb o|r kerdoryon ereiỻ a gaỽssant y gan

yr arglỽyd rys kymeint ac archassant hyt na ỽrthladỽyd

neb a|r|wled hono a gyhoedet vlỽydẏn kyn y gỽneuthur

ar hyt kymry a ỻoegẏr a|phrydein ac jwerdon a ỻawer o

wladoed ereiỻ. Yn|y vlỽydyn hono yn|y garwys yd ymgyn+

uỻaỽd kygor hyt yn ỻundein ỽrth gadarnhau kyfreitheu

yr eglỽysseu yno gyr bron cardinal o|rufein a dathoed

yno ỽrth y neges hono. a gỽedy meithrẏn kynỽrỽf y·rỽg

archesgob keint ac archesgob jorc y|teruysgỽyt y kyg+

or kanẏs y dyd kyntaf o|r kygor yr achubyssei archescob

Jorc eistedua y gadeir o|r tu deheu y|r kardinal yn|y ỻe

y dylyei ac y gnotaei archescob keint eisted. a|thranoeth

pan doethant ger bron y cardinal wedy amrysson y

gỽyd yr hoỻ lys am y teilygdodeu y doeth y rei o|r tu dra+

chefẏn y archescob jorc ac yd|ymhoelasant y gadeir yny

vyd gỽegil yr archescob y|r ỻaỽr a|r gadeir ar y vchaff

ac ỽynteu ar y draỽs ef gan y sathru a|e traet a|e fustaỽ

a|e dyrneu a breid y|dieghis yr archescob yn vyỽ odyno

Y vlỽẏdẏn rac·ỽyneb y ỻas einaỽn clut ac y|ỻas mor+

gan ap maredud. ac yna yd adeilaỽd yr arglỽyd rys

gasteỻ rayadyr gỽy. Y vlỽydyn racỽyneb y ryfelaỽd

meibon kynan yn erbyn yr arglỽyd rys. ac yna y|ỻas

katwaỻaỽn ac y dechreuỽẏt cofent y|manachlaỽc gaer

ỻion yr hon a|elwir deuma. ~

P etwar vgeint mlyned a|chant a|mil oed. oet. crist pan

vu varỽ alexander bab. ac yn|y ol ynteu y doeth lucius

yn pab ac yna y bu varỽ adaf esgob ỻan elyỽ ẏn|rẏt

NLW MS. 3035 (Mostyn 116) – page 183v