BL Cotton Titus MS. D IX – page 42v
Llyfr Blegywryd
42v
1
idaỽ. braỽdỽr o|vreint y tir hagen ny cheiff
2
gỽerth dros y|vraỽt. kannys gỽassannae ̷+
3
th tir yỽ. Yspeit pob braỽdỽr yỽ y|rodi barn
4
rỽg dadleuỽyr onny|s gỽybyd; pymthec
5
niwarnaỽt. kanny dylyir gossot oet dad+
6
leu yn llei yspeit no hynny. Os braỽdỽr
7
sỽydaỽc vyd; yna barnnet y dadyl a|oed
8
ar|oet. neu talet y sỽyd y|r brenhin heb
9
amgen gollet. kanny dyly neb gynhal
10
sỽyd yn|hỽy noc y gallo gỽneuthur y|gỽ+
11
assanaeth yn|y hamsser. Os braỽtỽyr o
12
vreint tir a|archant yspeit am|vraỽt. ae o
13
bedrustrer*. ae o eisseu rei o wyr y llys. y|rei
14
kyttrychaỽl a|gaffant oet heb tỽg. a|r
15
brenhin a|dyly kymell y|rei absen o|wys tr+
16
ỽy vechniaeth. neu auel. paỽb ohonunt
17
y|r eill* llys. a|phỽy|bynnac ohonunt yn|yr
18
oet kymeredic hỽnnỽ a|trymycco y|kyf+
19
uryỽ wys heb achaỽs adỽyn. camlyryus
20
vyd. Y|rei cattrychaỽl hagen barnnent
21
y|dadyl. neu|tygent na|s gỽdant rac colli
22
camlyryeu. ac yn|yr eil oet yn|y tryded lys
23
barnnent y dadyl heb neb ryỽ esgus. neu
24
y brenhin a gymero elchỽyl. ac a|gynhalyo
25
gauel paỽb ohonunt pan hyt varnnont
26
y dadyl honno a|e theruynu yn gỽbyl.
| « p 42r | p 43r » |