NLW MS. Peniarth 45 – page 100
Brut y Brenhinoedd
100
1
iarll y castell cadarn Canys mỽy y carei ef E+
2
udaf no neb. Ac mal yd oed trahayarn diwarn+
3
aỽt yn mynet o lundein. Sef a wnaeth y iarll
4
hỽnnỽ a chan marchaỽc y gyt ac ef llechu y
5
myỽn glyn coedaỽc ford y doi trahayarn. Ac yn|y
6
lle hỽnnỽ y llas trahayarn. A phan gigleu
7
eudaf hynny ymchoelut a wnaeth eudaf dra+
8
cheuyn. ynys. prydein. A gwasgaru y ruueinwyr o·ho+
9
ni a gwisgaỽ e|hun coron y teyrnas. Ac ar uyr+
10
der ymgyfoethogi a wnaeth o eur ac aryant
11
a|daoed ereill hyt nat oed haỽd caffel neb a|uei
12
arnaỽ y ouyn ac o hynny allan y kenhelis
13
Eudaf. ynys. prydein. hyt yr amser y bu Gracian a
14
ualaỽnt yn amherodron yn ruuein. ~ ~ ~ ~ ~ ~
15
AC yng kylch diwed y oes ymgynghor
16
a oruc Eudaf a|e wyrda pa wed yd adawei
17
y kyuoeth ygyt ac ef Canyt oed etiued na+
18
myn un uerch. Rei a|gynghorei idaỽ y rodi
19
y un o dyledogyon ruuein. Ar|teyrnas genti mal
20
y gellit kynhal yr ynys yn tangnouedus rac
21
llaỽ. Ereill a|gynghorei y rodi y urenhin o
22
wlat arall ac eur ac aryant genti. A rodi y
23
kyuoeth y kynan meirydaỽc nei y eudaf. Ac
24
eissoes y kynghores karadaỽc iarll kernyỽ gỽa+
25
haỽd attaỽ maxen wledic a rodi y uerch idaỽ
26
ar kyuoeth genti gỽedy ef Canys mab oed
| « p 99 | p 101 » |