NLW MS. Peniarth 18 – page 57v
Brut y Tywysogion
57v
1
llaỽr namyn caer dyf. Y|ulỽydyn honno yd|ym·gyn+
2
nullaỽd maelgỽn vychan ap maelgỽn ap rys. Ac
3
yỽein ap grufud. A rys gryc. A meibon hỽyntev. A|llu
4
llywelyn ap ioruerth. A llu iarll penuro am benn caer vyr+
5
din ac ymlad a|hi tri mis a gỽneuthur pont ar
6
tyỽi. a|orugant. Ac y|deuth y|llogỽyr yn aruaỽc
7
ygyt ar llanỽ y|torri y|pont. A gỽedy gỽelet o|r ky+
8
mry na phruythey y|hynt. vdunt. ymhoelut a
9
a*|ỽnaethant eu gỽladoed. Y ulỽydyn honno y|bu
10
varỽ rys gryc yn llan teilaỽ vaỽr. Ac y cladỽyt
11
ymynyỽ yn emyl bed y|tat. Y|ulỽydyn honno y
12
gorffennaỽd maelgỽn vychan adeilat trefilann
13
yr hỽnn a dechreuassei vaelgỽn y tat kynn o|hynny.
14
Y|ulỽydyn racỽyneb y brathỽyt yg|keuaỽl rikert
15
iarll penuro y|myỽn brỽydyr yn|y iỽerdon ỽedy
16
y|adaỽ o|e varchogyon yn tỽyllodrus. A chyn penn
17
y|pytheỽnos y|bu varỽ. Y|ulỽydyn honno y|gell+
18
ygỽyt grufud ap llywelyn ap ioruerth ỽedy y|vot yg|karchar
19
hỽe|blyned. Y|ulỽydyn honno y|bu varỽ catỽallaỽn
20
ap maelgỽn o vael enyd yn|y kỽm hir. Y|ulỽy+
21
dyn racỽynep y|bu varỽ yỽein ap grufud yn ystrat
22
flur duỽ merchyr ỽedy yr ỽythuetyd o|r ystỽyll
23
Ac y|cladỽyt ygyt a rys y|vraỽt yg|kabidyldy y
24
meneich. Y|ulỽydyn honno y|priodes henri vrenhin
25
verch iarll prouins. Ac y|gỽnaeth y|neithaỽr yn
26
llundein y|nadolyc ỽedy ym·gynnullaỽ esgyp.
| « p 57r | p 58r » |