NLW MS. 3035 (Mostyn 116) – page 200v

kyt coỻit bonhedigyon yno. ac odyna y|kychwynaỽd y kestiỻ|ned

a|chasteỻ ketweli ac y byryaỽd y|r ỻaỽr. Y|vlỽydyn hono y|ỻosges

maelgỽn jeuanc a ap maelgỽn ap rys aberteiui hyt ym|porth y

casteỻ ac y|ỻadaỽd yr hoỻ vỽrdeisseit ac yd|ymhoelaỽd yn vudu+

gaỽl wedy cael diruaỽr anreith ac amylder o yspeil. ac odyna

yd ymhoelaỽd ac y|torres pont aber teiui ac odyna y|doeth at|y+

wein ap gruffud. a gỽyr. ỻywelyn. ap joruerth y ymlad a|r casteỻ a|chyn pen ychy+

dic o|dydyeu y|torrassant y casteỻ a|magneleu ac y goruu ar

y casteỻwẏr a·daỽ y|muroed a|rodi y|casteỻ. Y|vlỽẏdẏn rac·ỽy+

neb y bu varỽ Jon breỽys o greulaỽn agheu wedy y yssigaỽ

o|e varch ac yna. y|bu varỽ jarỻ caer ỻion ac y bu varỽ yvra+

ham escob ỻan·elyỽy. Y|vlỽydyn rac·ỽyneb yd atgyweiraỽd

rikart jarỻ penuro braỽt henri vrenhin gasteỻ maeshyueid

yr hỽn a|distryỽassei. ỻywelyn. ap joruerth yr ys|dỽy vlyned kyn|no hẏnẏ

Y vlỽydyn hono y kyrchaỽd. ỻywelyn ap joruerth vrecheinaỽc ac y|distry+

waỽd hoỻ gestyỻ a|threfyd y|wlat drỽy anreithaỽ ac yspeilaỽ

pop ỻe ac ymlad a chasteỻ aber hodni vis a|wnaeth gyt

a bliuieu a|magneleu ac yn|y diwed peidaỽ drỽy ymhoe+

lud y dref oỻ yn ỻudỽy. ac yna ar y ymhoel y ỻosges dref

golunỽy ac y|darestygaỽd dyfryn teueidaỽc ac odyna

y kyrchaỽd y casteỻ coch ac y byryaỽd y|r ỻaỽr ac y|ỻosges

y dref croes oswaỻt. Y vlỽydyn hono y bu teruysc rỽg henri

vrenhin a|rikert marscal jarỻ penvro. ac yna y kyt·aruoỻes

y jarỻ a. ỻywelyn. ap joruerth ac a|thywysogyon kymry. ac yn|y ỻe kyn+

uỻaỽ diruaỽr lu a|oruc ef ac ywein ap gruffud. a|chyrchu

am|ben aber mynyỽ a|wnaethant a|e losgi. a gỽneuthur

aerua o|wyr y brenhin a|oedynt yno y* kadỽ o·dyna yn

ebrỽyd y goresgynassant hyn o gestyỻ kaer dyf ac aber