Cambridge Trinity College MS. O.7.1 – page 35v
Llyfr Blegywryd
35v
1
gỽedy hynny yr amdiffynnỽr y amdiffyn.
2
A herwyd hynny y dyly henuryeit gỽlat
3
kytsynyaỽ yn garedic pỽy o·honunt
4
yssyd yn adef gỽir pỽy nyt ittiỽ. A gỽe+
5
dy darffo yr henuryeit racreithaỽ eu
6
synhỽyr. A chadarnhau eu dull trỽy
7
tỽg. Yna y dyly y braỽtwyr mynet ar
8
neill tu a barnu herwyd dull yr hen+
9
uryeit. A dangos yr brenhin yr hyn a
10
uarnhont. A hyn yỽ deturyt gỽlat gỽe+
11
dy gỽrtheb. Ac uelly y teruynir dadleu tir.
12
PAn dechreuher kynhen am teruyn
13
tired neu trefyd. Os y·rỽg tir y
14
llys a thir y wlat y dechreuir. llys a ter ̷+
15
uynha. Os y·rỽg tir eglỽys. a thir y wlat.
16
eglỽys a teruynha. Os y·rỽg kyt etiue+
17
dyon; breint a teruyna. Os y·rỽg tir
18
kyfanned a thir diffeith. kynwarchadỽ
19
a teruynha. Adeil ac aradỽy yỽ kyfan+
20
hed. Pan teruynho llys; maer a chyg ̷+
21
hellaỽr bieu dangos drosti y theruyneu.
22
Os eglỽys; bagyl ac euegyl. Or byd
23
amrysson rỽg deu dyn vn ureint. Am
24
teruyn. Ac na ỽypper gỽir y·rydunt.
| « p 35r | p 36r » |