NLW MS. Peniarth 11 – page 234r

a|minneu a|af y|r fford yma. ac agatuyd mi a|deuaf y|r casteỻ

y bych ditheu heno yndaỽ. ar hynny laỽnslot a|aeth ymeith. ~

Myn vym|penn i heb y vorỽyn weldyma laỽnslot. ac nyt ydiỽ ef

y|m adnabot i. ac o|e|dewrder ef a|e kedernyt y coỻeis i y gỽr mỽ+

yaf a|garỽn. kanys ef a|gymheỻaỽd arnaỽ briodi vn araỻ

nys karei ynteu yn gymeint a|myui. ac ef a|eỻir gỽybot hyn+

ny etto. kanys yr hynny etto ny bỽytaaỽd hi ar vn bỽrd ac

efo. namyn y·gyt a|e ysgỽieryeit. ac ny wna neb yrdi hi y+

no dim. ac os da gan|duỽ mi a|baraf dial hynny arnaỽ kynn

y vynet o|r casteỻ yr a idaỽ heno y lettyu ~  

L aỽnslot a|gerdaỽd tu a|r casteỻ. ac ef a|welei yỽch penn

y porth penneu deudec o varchogyon urdolyon yng|croc.

ac ef a|welei varchaỽc urdaỽl yn|dyuot o|r fforest. ac ynteu a o+

vynnaỽd idaỽ pa|ry* gasteỻ oed hỽnnỽ. ac ynteu a|dywaỽt mae

casteỻ y griffỽns. Paham heb·y laỽnslot y croget racko y

saỽl benneu yssyd. Arglỽyd y marchaỽc merch y gỽr bieu y

casteỻ yssyd deckaf dyn yn yr|hoỻ vyt. ac ny mynnir gỽr idi

namyn y neb a|aỻo tynnu cledyf yssyd yn|y casteỻ y|myỽn co+

lovyn ym|perued y neuad. a|r neb a|e tynno. hỽnnỽ a|e keiff

hi. a|chỽbyl o|r rei a|wely di eu penneu racko a|e proues ac

ny thygyaỽd udunt. ac am na thynnassant ỽy y cledyf y ỻas

eu|penneu. ac nyt oes dynghetuen y neb y dynnu ef. ony

byd vn o|r rei yr ymdangosses y greal udunt neu vn o|r rei

a|vu yno. ac o mynny di vyng|credu i. ti a|ey y le araỻ y lettyu.

kanys ot ey di yna ef a vyd reit ytt odef y|penyt racko. neu di+

theu a dynno y|cledyf o|r ỻe y|mae. ac ny dylyy di vot yn drỽc