NLW MS. 3035 (Mostyn 116) – page 3r
Ystoria Dared
3r
1
ry lad y dat a|e gaerwẏr a dỽyn yr anreith vaỽr a dỽyn
2
esoniam y|chỽaer a|roessei erkỽlf y|telamon ac ar·estỽg troea
3
yn waratwydus a|hẏnẏ o|wyr groec. Trỽm y|kymerth
4
ef arnaỽ a|chrychu* casteỻ iỻium a|wnaeth. ac ecuba y|wreic
5
ygyt ac ef a|e veibon nyt amgen hector ac alexander
6
a deiphebus ac elenus a|throilus ac andromaca a|chassan+
7
dra a|pholixena y verch. a|meibon ereiỻ o orderchadeu he+
8
fyt ygyt ac ef. buyssynt varỽ meibon ereiỻ idaỽ ef o
9
orderchadeu y|rei ny dywedei neb eu hanuot o genedyl vren ̷+
10
hinyaỽl o·nyt y|rei a hanhoedẏnt o|wraged deduaỽl.
11
Priaf gỽedy ẏ dyuot y gasteỻ iỻium peri gỽneuthur
12
muroed maỽr ehalaeth ar dinas yn gadarnach a|wnaeth
13
ef a|heuyt gyt a|hyny y|peris ef bot yno luossogrỽyd
14
o|bobyl hyt na chywarsegit hỽẏ yn anỽybot vdunt
15
megys y|kywarsagỽyt ac y|goruuỽyt laomedon y|dat
16
ef. a|neuad vrenhinaỽl a adeilỽys ef hefyt ac aỻaỽr y
17
Jubiter a|e delỽ a gyssegrỽys ef yno. ac ef a|anuones
18
y ynys poenia. ac ef a wnaeth pyrth uchel kedyrn y
19
gaer droea. a ỻyma y henweu hỽy. antimodra dardani
20
ilia secta teribrica troiana. a gỽedy gỽelet ohonaỽ
21
ef. gaer droea yn gadarn ac yn diogel ef a arhoes
22
amser. a|phan|welas vot yn iaỽn idaỽ ef dial y|dat ef
23
a|erchis galỽ attaỽ antenor. ac a|dywaỽt ỽrthaỽ
24
y|mynei eỻỽg kenat y|roeg y ofyn iaỽn y wyr groec
25
am y|kameu a|r saraedeu a|wnathoedynt idaỽ ef
26
Nyt amgen noc ageu y|dat a dygedigaeth y|chỽaer
27
a gỽedy gorchymun o briaf y antenor mynet a|wnaeth
28
ef y|log ac ef a|deuth y|r ỻe a|elwit magnesia at pel+
29
eus. ac ef a|e haruoỻes peleus ef ac a|e ỻetyaỽd
30
tri diwarnaỽt. a|r petwyryd dyd ef a o·vynaỽd idaỽ
| « p 2v | p 3v » |