Oxford Jesus College MS. 57 – page 32
Llyfr Blegywryd
32
1
Y dir a|geif yn ryd. a rann o aryant y gỽastro+
2
dyon. Y verch a vyd vn|vreint a merch y bard
3
teulu. Y ebediỽ yỽ chỽeugeint. Gỽastraỽt afỽ+
4
yn. galanas a sarhaet yssyd idaỽ. val y|dywet+
5
pỽyt vry. Ef a|dyly peri y|r brenhin y varch
6
a|e arueu yn baraỽt pan y mynno. ac a|e dei+
7
ly pan esgynno. a|phan|disgynno. ac a|e|dỽc
8
o|e letty. O ebolyon anrec. rann gỽr a|geif.
9
Naỽd dryssaỽr ystauell yỽ. Hebrỽng y dyn
10
att y porthaỽr. Y sarhaet a|e alanas a vyd me+
11
gys dryssaỽr neuad. Y dir a|geif yn ryd. a|e varch
12
yn|wastat gan y brenhin. Sỽydogyon a|aỻant
13
yn ryd mynet y|r neuad. ac y|r ystaueỻ ac
14
y|r gegin. O pob anreith a|del y|r porth. y por+
15
thaỽr a|geif y ỻỽdyn diwethaf. Ef a|geif pedeir
16
keinyaỽc o bop karcharaỽr. a|garcharer trỽy
17
un nos. Galanas a sarhaet coc. a vyd megys
18
y dywetpỽyt vry. a|e varch yn vossep gan y bren+
19
hin. amysgar yr hoỻ aniueilyeit a lader yn|y
20
ỻys a|geif y coc dyeithyr y caỻonneu. Rann
| « p 31 | p 33 » |