Cardiff MS. 1.362 (Hafod 1) – page 50r
Brut y Brenhinoedd
50r
leuessynt dyuot y tir ynys prydein. kans ef a gerdei* na le+
uessynt wy dyuot ar y tor ef yn uarỽ; y gỽr a|wna+
doed udunt yn|y vyỽyt y gynniuer deffynyd offyn ac
aruthred ar a|wnadoed ef. Ac eissoes gỽedy y varỽ ef.
kyghor a oed waeth a|wnathant ỽy. cladu y gorff ef yn
A Gwedy marỽ gỽertheuyr vendi +[ llundein.
geit. y doeth gỽrtheyrn gỽrtheneu y gyuoeth trache+
uyn. A gỽedy caffel o·honnaỽ y vrenhinyaeth. o arch ac an+
noc y wreic anuon a|wnaeth hyt yn germania y erchi
y hengyst dyuot tracheuen y ynys prydein yn yscyfalahaf
y gallei o niuer rac offyn geni teruysc eilweith y·rydunt
ar brytanyeit. Ac yna pan gigleu hengyst yr uarỽ. gỽer+
theuyr vendigeit. kynnullaỽ a oruc ynteu try|chant mil
o uarchogyon aruaỽc a|chyweiraw llyges. Ac ymcholut
tracheuyn hyt yn ynys prydein. A gỽedy gỽybot o|r bry+
tanyeit bot nifer kymeint a|hynny yn dyuot. Sef a ga+
ỽssant yn eu kyghor ymlad ac ỽynt kyn eu dyuot yr
tir. A diffryt y porthuaeu racdunt. A gỽedy anuon o|e
verch attaỽ ef y uenegi hynny. Sef a|ỽnaeth ynteu
ystrywyaw bredychu y bryttanyeit trỽy arỽyd tagneued.
Ac auon* ar y brenhin y uenegi idaỽ nat yr keissyaỽ trigy+
aỽ yn yr ynys y doethant y saỽl niuer hỽnnỽ y gyt ac ef
namyn tebygu bot gwertheuyr ettwa y uyỽ y dugassei
y niuer hỽnnỽ y amdiffyn racdaỽ. Ar niuer a uynnho
gỽrtheyrn onadunt; attalyet yn wyr idaỽ. Ac ar ny myn+
no; ellyghet y ymdeith yn diannot. A gỽedy datganu
hynny yr brenhin rodi tagneued a|wnaeth udunt. Ac er+
chi yr kiỽtaỽtwyr ac yr saesson duỽ kalan mei a|oed yn
agos y hymny*; dyuot ygyt hyt y maes kymry y wneu+
thur
| « p 49bv | p 50v » |