LlGC Llsgr. Llanstephan 27 (Llyfr Coch Talgarth) page 110v

naeth gỽyrtheu rac bronn pharao vrenhin yr eifft. Ac yna yd

oed·ynt Jamnes a membres dewinyon. a|r rei hynny a|w+

naethant wyrtheu kyfryỽ ac a|wnathoed moẏsen rei o·na+

dunt. ac megys y kymerth gỽyr yr eifft ỽynt. a chyt nat

yttoedynt o duỽ y gỽyrtheu hynny a|beỻaassant. ac ỽynt ac

a|gredaỽd udunt. ac ỽrth hynny peidyỽch chỽitheu a|r|dyn

hỽnn kannyt teilỽng y uarỽ. Yna y|dywaỽt yr Jdewon

ỽrth nichodemus. Byd disgybyl di idaỽ ef. a|dyro dy eir

drostaỽ. Ae disgybyl idaỽ ef yỽ y raclaỽ heb·y nichodemus.

ac y|mae yn rodi geir drostaỽ. Ponyt cesar a|e|gossodes ef

yn|y medyant y mae. a ffroeni ỽrthaỽ. a|disgyrnu danned

arnaỽ. ac erchi idaỽ kymryt y nerth ef a|e gyfran. a bit

ueỻy heb·y nichodemus. a minneu a|e kymeraf ual y

dywedassaỽch chỽi. ac araỻ o|r Jdewon a neidyaỽd y uyny.

ac a erchis y raclaỽ kennat y dywedut. Dywet a vyn+

nych heb y raclaỽ. Mi a vum yn vn gỽely heb ef yn go+

rwed deunaỽ mlyned ar|hugeint. ac a|dolur a pherigyl

arnaf beunyd o hynny. ac yd oed ereiỻ o dynyon a gor+

ffỽyỻ yndunt. ac am·ryỽ gleuytyeu yndunt. a phan do+

eth Jessu heibyaỽ ef a|n iachaaỽd oỻ. ac yd erchis y min+

neu dyuot o|m gỽely. ac ymdeith a|orugum yr aỽr honno

ac y bum Jach. ac y dugum uyng|gỽely ac y kedeis*. Heb

ỽynteu yr idewon ỽrth pilatus. Gouyn|di idaỽ ef pa|dyd yd

Jachaỽyt ef ueỻy. Y sadỽrn heb hỽnnỽ. A phonyt ueỻy heb

ỽynteu y|dywedassam ni ytti. Jachaỽ ohonaỽ ef y sadỽrn.

a|bỽrỽ dieuyl o dynyon. ac araỻ a neidyaỽd y|uyny. Heb

olỽc y|m ganet i heb ef. a mi a glyỽn ymadraỽd dynyon.

a|phan

NLW MS. Llanstephan 27 (The Red Book of Talgarth) – page 110v