LlGC Llsgr. 3035 (Mostyn 116) page 184r

ychen ac y|cladỽẏt y|manachloc ossnei. Y|vlỽydẏn racỽyneb y

ỻas randỽlf de|poyr a ỻawer o varchogẏon y·gyt ac ef y

gan jeuegtit kaer wynt. Y vlỽydẏn rac·ỽyneb y bu varỽ henri

jeuaf vrenhin ỻoegyr. ac y bu varỽ ricart archescob keint

Y|vlỽydyn racỽyneb y bu varỽ ryderch abat y|ty gỽyn

a Meuruc abat y cỽm hir. Y vlỽydẏn rac·ỽyneb amgylch

y garawys y doeth padriarch caerussalem hyt yn ỻoeger

y|eruyneit nerth y gan y brenhin rac distryỽ o|r ideỽon

a|r|sarasinyeit hoỻ gaerusalem a|chẏt ac amylder o varch+

ogyon a|phedit yd ymchoelaỽd drachefẏn y|gaerussalem

Yn|y vlỽydẏn hono duỽ calan mei y|symudaỽd yr heul y|ỻiỽ

ac y|dywaỽt rei vot erni diffyc. Y|vlỽydyn hono y bu varỽ

dauid abat ystrat flur ac y bu varỽ hỽel ap jeuaff arglỽyd

arỽystli ac y chadỽy* yn an·rydedus yn ystrat flur. ac yno

y|bu varỽ einyaỽn ap kynan. Y vlỽydẏn rac·ỽyneb y bu

varỽ lucius bap ac yn|y le yd vrdỽyt y trydyd vrbanus yn

bap. Yn|y vlỽydyn hono amgylch mis gorfena yd aeth co+

fent ystrat flur y|redynaỽc velen yg|gỽyned. ac yna y

bu varỽ pedyr abat yn dyfryn clỽyt. ac yna y ỻas cat+

waladyr ap rys yn dyfet ac y|cladỽyt yn|y ty gỽyn.

Yn|y vlỽydyn hono y bu varỽ Jthel abat ystrat march+

eỻ. ac yna y|ỻas ywein ap Madaỽc gỽr maỽr y volẏ+

ant. kanys kadarn oed a|thec a|charedic a hael ac

adurn o voesseu da y gan deu vab ywein kyfeilaỽc

nyt amgen gỽenỽynỽn a chatwaỻaỽn a hyny drỽy

nossaỽl vrat a|thỽyỻ y garec oua ac yna y delit

ỻywelyn ap katwaỻaỽn yn enwir y|gan y vrod+

dyr ac y|tynỽyt y lygeit o|e pen. ac yna y diffeith+

aỽd

NLW MS. 3035 (Mostyn 116) – page 184r