NLW MS. Llanstephan 27 (The Red Book of Talgarth) – page 150v
Purdan Padrig
150v
1
aỽt ynteu. mi a|welaf yno megys eur yn ỻosgi myỽn ffỽrn
2
Je heb ỽynteu porth paradwys nefaỽl yỽ hỽnnỽnnỽ*. Ac
3
y|r porth hỽnnỽ yd aant y rei a|dycker y gennym ni y nef
4
ac ny dylyir dirgelu ragot ti y wed y pyrth yr arglỽyd ni
5
un·weith beunyd o vỽyt nefaỽl. Ti a|e gỽybydy hagen yn
6
aỽr gyt a|ni pan yn portho duỽ pa|gyffelyb vỽyt vo hỽnnỽ.
7
ac ar hynny nachaf megys fflam o dan yn|disgynnu o|r|nef
8
ac yn kudyaỽ yr hoỻ wlat. ac yn wahanredaỽl y disgynna+
9
ỽd ym penn pob un o·honunt megys peleidyr. ac o|r|diwed
10
yr hoỻ fflam a aeth yndunt. Odyna ynteu a oỻyngaỽd
11
yn|y gorff a|e gaỻon kymeint o velyster a|digrifỽch hyt
12
na dyaỻei beth oed ae byỽ ae marỽ rac meint y melyster.
13
Ehegyr hagen yd aeth yr aỽr honno heibyaỽ. ỻyma heb
14
ỽynteu y bỽyt a|daỽ y ni y gan duỽ un·weith beunyd o|n
15
porthi. Y neb a el y ỽrthym ninneu y nef o|r|bỽyt hỽnn yd
16
aruer yn dragywydaỽl. a chan gỽeleist di yn prouedigaeth
17
ni yr hynn a damuneist y welet. nyt amgen gorffowys
18
y rei da a phoeneu y rei drỽc. reit yỽ ytti vraỽt vynet yr
19
un fford y doethost drachefyn. ac o|r byd kymhedraỽl a|glan
20
dy uuched o laỽ hynn. diogel yỽ ytt gaffel y gorffowys
21
hỽnn yma. a nef odyma. O ỻygry ditheu dy vuched he+
22
rỽyd ewyỻys y knaỽt. dy bressỽylua a vyd yn|y poeneu
23
a|weleist di yn dragywyd. Dos di drachefyn. a|diogel vyd
24
ytt. kany wely yn mynet a weleist yn dyuot. Ac yna y
25
dechreuaỽd y marchaỽc yn ofnaỽc ac yn drist gỽediaỽ y|r
26
archesgyb hyt na chymheỻit ef y ymchoelut o|r ỻe hỽn+
27
nỽ y boeneu y byt hỽnn yma. Ny eỻir a|dywedy di heb ỽy.
| « p 150r | p 151r » |