NLW MS. Llanstephan 27 (The Red Book of Talgarth) – page 111r
Efengyl Nicodemus
111r
1
a phan yttoed Jessu yn kerdet heibyaỽ. ỻefein arnaỽ a|wneuth+
2
um a|dywedut ỽrthaỽ. Trugarhaa ỽrthyf i vab dauyd a|thrugarhau
3
a|oruc ynteu a rodi y dwylaỽ ar vy ỻygeit. ac yn|diannot
4
y gỽeleis. Ac araỻ a|dywaỽt o|r idewon y uot yn|gryuachedic
5
a Jessu o|e ymadraỽd a|m|dyrchafaỽd. ac araỻ a|dywaỽt y uot
6
yn glafỽr. a chaffel y gan iessu waret. a gỽreic veronic oed y
7
henỽ. a|dywaỽt y bot deudeng mlyned a|r gỽaetlin arnei. Ac
8
ual y rodes Jessu y laỽ ar odre vyn|diỻat y peidyaỽd y gỽaet+
9
lin. Ac yna y dywaỽt yr Jdewon. yn kyfreith ni yỽ na chymme+
10
rom tystolyaeth gỽreic. a ỻuossogrỽyd maỽr o|r Jdewon a
11
dywedassant o hyt eu ỻef y vot yn proffỽyt a|darostỽng o|r di+
12
euyl idaỽ. Paham na darostyngant ỽy y|n athraỽon ni heb
13
ỽy. Ac ỽynteu a|dywedassant na|s gỽydynt ỽy. Ereiỻ o|r Jdeỽ+
14
on a|dywedassant ry gyuodi lazar ohonaỽ o veirỽ. gỽedy y
15
vot bedwar niwarnaỽt yn|y|bed. A phan|gigleu y raclaỽ hyn+
16
ny yn ofnaỽc y dywaỽt ỽrth luossogrỽyd yr ideỽon. Pa vỽyny+
17
ant yỽ y chỽi goỻỽng gỽaet y gỽirion hỽnn. a|galỽ a|oruc
18
pilatus ar nichodemus. ac ar y|deudengwyr a|dywedassynt na
19
anydoed ef o|ffyrnigrỽyd. a dywedut ỽrthunt. Pa beth a|wnaf|i
20
heb ef am y tỽyll a|r brat y mae yr bobyl yn|y wneuthur am
21
Jessu. Na|wdam heb ỽynt. ỽynt a|welhont. ac odyna galỽ at+
22
taỽ. a|dywedut ỽrthunt bot eu defaỽt yn dyd gỽylua gollỽng
23
o·honunt un o|r carcharoryon. Y|mae gennyf|i heb·y pilatus
24
ỻofryd kelein. barraban y|enỽ. ac ny welaf i ry haedu o|Jessu
25
dim. A pha un o·honunt ỽy a|vynnỽch chỽi y oỻỽng. Geỻỽng
26
heb ỽynteu ynni barraban. Pa|wnaf inneu y Jessu yr hỽnn
27
a elwir crist. Heb ỽynteu oỻ y grogi. nyt ỽyt gedymdeith y
| « p 110v | p 111v » |