NLW MS. Peniarth 11 – page 190v
Ystoriau Saint Greal
190v
1
hi a|doeth aỻan y|r fford y dylyei laỽnslot dyuot idi. A hynny
2
y|myỽn cottardi o vliant. Ac yr aỽr y gỽeles laỽnslot hi ef a
3
disgynnaỽd ac a|gyfarchaỽd gỽeỻ idi. a|hitheu a|wnaeth arw+
4
ydyon ỻewenyd idaỽ ynteu. A vnben heb hi tro y|r fford yman
5
a|mi a|baraf ytt letty. ac y mae yn nos haeach. ac nyt oes yti
6
chweith kyuanned o hynn hyt ar deugeint miỻtir.
7
A vnbennes heb·y laỽnslot amser yỽ y lettyu a|duỽ a
8
dalo y|ttitheu dy lewenyd. Ac ueỻy yd aethant dan
9
ymdidan y·gyt. hyt y ỻe yd oed eu kyuanned. ac yno nyt o+
10
ed namynn y corr. a|r marchogyon herwyr a|oedynt ym|peỻ
11
yn|y fforest. Yna y corr a|gymerth march laỽnslot ac a|e hys+
12
tablaỽd. a|laỽnslot a|aeth y|r neuad ac a|orffowyssawd ar|wely.
13
Ac ar hynny y corr a|doeth ac a ymgynnigyaỽd idaỽ o|e
14
diaruu. A vnben heb·y laỽnslot mi a aỻaf yn|diargywed di+
15
odef vy arueu ymdanaf. Arglỽyd heb yr vnbennes na|thydi
16
na neb ny chỽsc yma yn aruaỽc. A|phei vỽyaf y heiryolei
17
hi arnaỽ ef diosc y arueu. mỽyaf yr afrangei vod idaỽ ynteu
18
hynny. rac mor ffyrnic yr oed yn tybyeit bot y ỻe. arglỽyd
19
heb hi ef a|welir ymi dy uot ti yn ovynhau o ryỽ beth. eissyo+
20
es nyt reit ytti ovynhau yma o|dim. kanys digaỽn yỽ dio+
21
gelet yma. Eissyoes ny wnn i na|bo ytti elynyon. A vnbennes
22
heb·y laỽnslot. ny weleis i eirmoet vn dyn a|vei gyflaỽn gare+
23
dic gan baỽp. Ar hynny laỽnslot a eistedaỽd y vỽytta ar y
24
bỽrd yn aruaỽc. a|e waeỽ a|e|daryan geyr y laỽ. A gỽedy y|vỽyt
25
ef a|aeth y gysgu a|e gledyf ymdanaỽ. a chysgu a|oruc ef ar
26
hynt kanys blin a|ỻudedic oed. Yna y corr a|vỽryaỽd neit ar
27
geuyn march laỽnslot. ac a|aeth hyt y|ỻe yd oed y pum march ̷+
28
aỽc.
| « p 190r | p 191r » |