LlGC Llsgr. 3035 (Mostyn 116) page 177r

ỻywelyn ap Madaỽc y vab y gỽr a oed vnic obeith y hoỻ

wyr powys ac yna y delis catwaỻaỽn ap Madaỽc ap jtnerth

einaỽn clut y vraỽt ac yd anuones yg|katỽryaeth ỽein gỽy+

ned ac ywein a|e rodes y|r freinc a thrỽy y gytymdeithon y|diegis

hyt y|nos o|wicỽm yn ryd. ~ ~

T rugein mlyned a|chant a mil. oed. oed. crist pan vu varỽ agharat

gỽreic ruffud ap kynan. Y vlỽydyn hono y|bu varỽ Meuryc

esgob bangor. Y vlỽydyn hono y gỽerysgynaỽd hỽel ap jeuaff o

dỽyỻ gasteỻ dafalwern yg|kefeilaỽc ac o achaỽs hynẏ y syrth+

aỽd ywein gỽyned yg|kymeint o dolur ac na aỻei na thegỽch

teyrnas na didanỽch neb ryỽ dim araỻ y arafhau na|e dyn+

nu o|e gymeredic lit. ac eissoes kyt kyrchei andiodefedic

dristit vedỽl ywein. deissyuyt lewenyd o|rac·weledigaeth

duỽ a|e kyfodes. kanẏs yr vn ryỽ ywein a|gyffroes vn ryỽ lu

y arỽystli hyt yn ỻan dinan. a gỽedy kahel diruaỽr anreith

onadunt ym·gynuỻaỽ a oruc gỽyr arỽystli amgylch trych+

anỽr y·gyt a hỽel ap jeuaf y harglỽyd y ymlit yr anreith. a

phan welas ywein y elynyon yn dyuot yn deissyfic* annoc

y|wyr y ymlad a oruc a|r gelynyon a ymladassant ar|fo gan y

ỻad o|ywein a|e wyr yny vu vreid y diegis y trayan a·dref ar fo.

a phan gyflenwis y ỻewenyd hỽnỽ vedỽl ywein yna yd ymchoe+

laỽd ar y gyssefin ansaỽd wedy y rydhau o|e gymeredic dristit

ac atgyweiraỽ y casteỻ a oruc. Y vlỽydẏn rac·ỽyneb y|dygỽy+

daỽd caer offa y gan ywein ap gruffud ap ac ywein ap Madaỽc

a Maredud ap hỽel. Y vlỽydyn hono y kyffroed henri vrenhin

ỻoegẏr lu yn erbyn deheubarth ac y doeth hyt y|mhen kadeir

a gỽedy rodi gỽystlon o rys idaỽ ymchoelut y loeger. ac yna

y|ỻas einaỽn ap ynaraỽt yn|y|gỽsc y gan waỻter ap ỻywarch

NLW MS. 3035 (Mostyn 116) – page 177r