Oxford Jesus College MS. 57 – page 196
Llyfr Blegywryd
196
1
attebet ynteu ual|hynn. bot idaỽ dogyn yn|y
2
gyfreith a geidỽ. geni a meithryn yr aniueil
3
ganthaỽ a|e uam kynnoc|ef. ac na|s gỽahanaỽd
4
perchennogaeth ac ef o|r geniuer fford y gỽaha+
5
na dyn a|e aniueil. kymodaỽc uch ỻaỽ. ac araỻ
6
is ỻaỽ. Sef yỽ y rỽy* wyr hynny. kymodaỽc uch
7
breint. ac araỻ is breint. Ereiỻ a|dyweit mae
8
y deu gymodaỽc nessaf ynt. o|r keiff ual y dyly
9
bot. Os gỽadu* kynn coỻ a|wna. gỽybydet y|gan+
10
thaỽ pa amser y coỻes y|da. a gỽedy ys|gỽypo cadỽ+
11
et ef ganthaỽ y vot ef yn wir berchennaỽc ar
12
yr aniueil. a|e warchadỽ ohonaỽ ae dyd ae|deu.
13
ae a|vo hỽy o amser noc o hyt yr pan goỻes y|ỻaỻ
14
y lỽdyn. a|thrỽy dogyn o geitweit. ac o|r keiff hynny
15
dogyn yỽ idaỽ. Os arwaessaf y dengys y ardelỽ
16
neu fford araỻ y maes o waessaf*. gouynnet yr
17
yngnat idaỽ pỽy dy ardelỽ di. a|pha|le y|mae. Os
18
yn|y ỻe y byd gouynner idaỽ a|gymer y ỻedrat
19
attaỽ. ac os kymer bit ryd ynteu. a|r haỽlỽr bieu
20
o|r mynn yr|eidaỽ y damdỽng yn|y laỽ ynteu yn|di+
| « p 195 | p 197 » |