BL Harley MS. 958 – page 31v
Llyfr Blegywryd
31v
1
hỽẏnt o|r wlat a|thraẏan ẏr ẏt a|r bỽẏt o pop
2
marỽtẏ taẏaỽc. Maer bieu rannu pop peth.
3
A righẏỻ bieu dewis ẏ|r brenhin. O|r dam+
4
weina na aỻo maer dalẏ tẏ. kẏmeret ef ẏ taẏ+
5
aỽc a|dewisso ẏn|ẏ vaeroni ulỽẏdẏn o|r kalan
6
mei ẏ|r ỻaỻ. A mỽẏnhaet ef laeth ẏ taẏaỽc
7
ẏr haf. a|e ẏt ẏ kẏnhaẏaf. A|e voch ẏ gaẏaf.
8
A phan el ẏ bilein ẏ ỽrthaỽ gadet idaỽ pedeir
9
hẏch a baed. a|r ẏscrẏbẏl ereiỻ oỻ. Ac ỽẏth erỽ
10
gwanhỽẏn·ar. A phedeir gaẏaf·ar. A|r eil ulỽẏ+
11
dẏn a|r trẏded gỽnaet ueỻẏ o vilaeneit ereiỻ.
12
Ac odẏna ẏ·mborthet teir blẏned ereiỻ ar ẏ ei+
13
daỽ e|hunan. Ac odẏna gwaredet ẏ brenhin ar+
14
naỽ o rodi bilaeneit idaỽ ẏn|ẏ mod gẏnt. Nẏ
15
cheiff maer na|chẏgheỻaỽr ran o tỽnc neu prit
16
ẏ gan ẏ brenhin. Maer a|chẏgheỻaỽr bieu ca+
17
dỽ diffeith ẏ brenhin ẏnẏ wnel ẏ vod ohonaỽ.
18
Ac ỽẏnt o gẏfreith a gaffant ẏ mel a|r pẏscaỽt a|r
19
bỽẏstuilet bẏchein gwẏỻ. O ennill ẏ brenhin oỻ
20
ẏ gan ẏ vilaeneit ẏ traẏan a gahant. O|r gwẏr
21
rẏd nẏ chahant dim. Nẏ bẏd penkenedẏl maer
22
hẏt tra vo maer. Ac nẏ|cheiff eistedua dilis ẏn
23
neuad ẏ brenhin. Tri dẏn a gẏnheil ef gantaỽ
24
ẏg kẏfedach ẏn neuad ẏ brenhin. kẏlch a geiff
25
ar uilaeneit ẏ brenhin dỽẏ·weith ẏn|ẏ ulỽẏdẏn
26
ar ẏ pedwẏrẏd. Ẏn anreith ẏ·d|a ar ẏ petwẏrẏd
| « p 31r | p 32r » |