NLW MS. 3035 (Mostyn 116) – page 184v
Brut y Tywysogion
184v
1
ac y ỻosges Maelgỽn ap rys dinbych. y gỽr a|oed taryan a|cha+
2
dernit y|r hoỻ deheu canys eglura oed y glot a thec a cha+
3
redic oed gan paỽb. kyt bei kymhetraỽl y|veint garỽ ỽrth
4
y|elynẏon hegar ỽrth y getymdeithon paraỽt y|rodyon
5
budugaỽl yn ryfel a|r hoỻ dywyssogyon kyt·amhino+
6
gẏon ac ef a|e hergrynynt. kyffelyb y leỽ yn|y weithredoed
7
ac megys keneu ỻeỽ aruthyr yn|y helua y gỽr a ladaỽd ỻawer
8
o|r flandraswyr ac a|e gyrraỽd ar|fo. Y|vlỽydẏn rac·ỽyneb
9
y doeth y sarasineit a|r ideỽon y gaerussalem gan dỽyn y
10
groc gantunt duỽ merchẏr y|ỻudu a goreskẏn kaerussa+
11
lem a|chymeint ac a|gaỽssant o gristonogyon yndi ỻad
12
rei a|wnaethant a dỽyn ereiỻ yg|keithiwet ac o achaỽs
13
hynẏ y kymerth phylip vrenhin freinc a henri vrenhin
14
ỻoegẏr ac archescob keint ac aneiryf o luossocrỽyd cristo+
15
nogyon ac arỽydon croes crist arnut*. Y vlỽdẏn* rac·ỽyneb
16
y|bu varỽ henri. ac yn|y ol ynteu y coronet rikert y vab yn
17
vrenhin y|marchaỽc goreu a gleỽha. Y vlỽydẏn hono y go*+
18
resgyaỽd yr arglỽyd rẏs gasteỻ seint cler ac aber coran
19
a ỻan ẏstẏffan. Yn|y vlỽydẏn hono y delit maelgỽn ap
20
rys y gan y tat drỽy gygor rys y vraỽt ac y carcha+
21
D eg|mlyned a|phetỽar vgein a|chant [ rỽyt
22
a mil oed. oet. crist pan aeth phylip vrenhin freinc
23
a|rickert vrenhin ỻoegyr ac archescob keint a dir+
24
uaỽr luosogrỽyd o ierỻ* a baruneit ygyt ac ỽynt
25
y|garussalem. Yn|y vlỽydẏn hono yd adeilaỽd yr
26
arglỽyd rẏs gasteỻ ketỽeli ac y bu varỽ gỽenỻi+
27
ant verch rys vlodeu a|thegỽch hoỻ gymrẏ. Y
28
vlỽẏdẏn racỽyneb y|bu varỽ gruffud maelaỽr
| « p 184r | p 185r » |